ਕੀ ਚੀਨ ਕਰੇਗਾ ਪਰਮਾਣੂ ਪ੍ਰੀਖਣ? 

*ਗੁਪਤ ਤਰੀਕੇ ਨਾਲ ਬਣਾਇਆ ਪਰਮਾਣੂ ਬੇਸ, ਸੈਟੇਲਾਈਟ ਫੋਟੋਆਂ ਕਾਰਨ ਤਣਾਅ 'ਚ ਅਮਰੀਕਾ

*ਚੀਨ ਦੇ ਹਮਲੇ ਦੇ ਡਰੋਂ ਅਮਰੀਕਾ ਫਿਰ ਤਿਆਰ ਕਰ ਰਿਹਾ ਹੈ ਹੀਰੋਸ਼ੀਮਾ ਪਰਮਾਣੂ ਹਮਲਾ ਕਰਨ ਵਾਲੇ ਏਅਰਬੇਸ   ਦੀ ਤਿਆਰੀ

ਚੀਨ ਨੇ ਲਗਪਗ ਛੇ ਦਹਾਕੇ ਪਹਿਲਾਂ ਲੋਪ ਨੂਰ ਵਿੱਚ ਪਰਮਾਣੂ ਬੰਬ ਦਾ ਪ੍ਰੀਖਣ ਕੀਤਾ ਸੀ, ਉੱਥੇ ਤਾਜ਼ਾ ਗਤੀਵਿਧੀਆਂ ਨੇ ਅਮਰੀਕਾ ਦੀਆਂ ਚਿੰਤਾਵਾਂ ਵਧਾ ਦਿੱਤੀਆਂ ਹਨ। ਦਾ ਨਿਊਯਾਰਕ ਟਾਈਮਜ਼ ਦੀ ਰਿਪੋਰਟ ਦੇ ਅਨੁਸਾਰ, ਇੱਕ ਡ੍ਰਿਲਿੰਗ ਰਿਗ ਨਾਲ ਜ਼ਮੀਨ ਵਿੱਚ ਇੱਕ ਮੋਰੀ ਕੀਤੀ ਹੈ, ਜੋ ਸੰਭਾਵਿਤ ਤੌਰ 'ਤੇ 500 ਮੀਟਰ ਤੋਂ ਵੱਧ ਡੂੰਘਾ ਹੈ। ਅਮਰੀਕਾ ਵਲੋਂ ਇਸ ਗੱਲ ਉਪਰ ਚਿੰਤਾ ਜਤਾਈ ਜਾ ਰਹੀ ਹੈ ਕਿ ਚੀਨ ਇੱਕ ਨਵੇਂ ਪ੍ਰਮਾਣੂ ਹਥਿਆਰ ਦਾ ਪ੍ਰੀਖਣ ਕਰ ਸਕਦਾ ਹੈ, ਜਿਸ ਨਾਲ ਉਸਦੇ ਪ੍ਰਮਾਣੂ ਹਥਿਆਰਾਂ ਦੀ ਘਾਤਕਤਾ ਵਿੱਚ ਵਾਧਾ ਹੋਵੇਗਾ। 

ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਮਿਲਟਰੀ ਕੰਪਲੈਕਸ ਦੀਆਂ ਸੈਟੇਲਾਈਟ ਤਸਵੀਰਾਂ ਤੋਂ ਤਾਜ਼ਾ ਬੋਰਹੋਲ ਦਾ ਖੁਲਾਸਾ ਕਰਦੀਆਂ  ਹਨ। ਇਹ ਬੋਰਹੋਲ ਪ੍ਰਮਾਣੂ ਧਮਾਕਿਆਂ ਦੇ ਖਤਰਨਾਕ ਨਤੀਜਿਆਂ ਨੂੰ ਰੋਕਣ ਲਈ ਸਮਰਥ ਜਾਪਦੇ ਹਨ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਮਿਲਟਰੀ ਕੰਪਲੈਕਸ ਵਿੱਚ ਕਈ ਸੁਧਾਰ ਅਤੇ ਅਪਗ੍ਰੇਡ ਕੀਤੇ ਗਏ ਹਨ। ਕਾਰਨੇਗੀ ਐਂਡੋਮੈਂਟ ਫਾਰ ਇੰਟਰਨੈਸ਼ਨਲ ਪੀਸ ਦੇ ਟੋਂਗ ਝਾਓ ਸਮੇਤ ਬਹੁਤ ਸਾਰੇ ਪ੍ਰਮਾਣੂ ਮਾਹਿਰ, ਇਸ ਸਬੂਤ ਨੂੰ ਲੋਪ ਨੂਰ ਵਿਖੇ ਫਿਰ ਤੋਂ ਪ੍ਰਮਾਣੂ ਪ੍ਰੀਖਣ ਕਰਨ ਦੀਆਂ ਤਿਆਰੀਆਂ ਵਜੋਂ ਮੰਨਦੇ ਹਨ।

ਲਾਸ ਅਲਾਮੋਸ ਹਥਿਆਰ ਪ੍ਰਯੋਗਸ਼ਾਲਾ ਦੇ ਸਾਬਕਾ ਨਿਰਦੇਸ਼ਕ, ਸੀਗਫ੍ਰਾਈਡ ਐਸ. ​​ਹੇਕਰ ਨੇ ਕਿਹਾ ਕਿ ਇੱਕ ਵਾਰ ਫਿਰ ਤੋਂ ਲੋਪ ਨੂਰ ਵਿਖੇ ਇੰਨਾ ਜ਼ਿਆਦਾ ਨਿਰਮਾਣ ਅਸਾਧਾਰਨ ਹੈ। ਚੀਨ ਦੀ ਸਰਗਰਮੀ ਅਮਰੀਕਾ ਅਤੇ ਰੂਸ ਨਾਲੋਂ ਵੱਖਰੀ ਹੈ। ਉਸਨੇ ਕਿਹਾ ਕਿ ਰੂਸੀਆਂ ਅਤੇ ਅਮਰੀਕੀਆਂ ਨੇ ਆਪਣੇ ਟੈਸਟਿੰਗ ਸਾਈਟਾਂ 'ਤੇ ਸਰਗਰਮੀ ਜਾਰੀ ਰੱਖੀ ਹੈ। ਪਰ ਬਹੁਤਾ ਕੁਝ ਨਹੀਂ ਕੀਤਾ। ਵਿਸ਼ਲੇਸ਼ਕਾਂ ਦਾ ਕਹਿਣਾ ਹੈ ਕਿ ਲੋਪ ਨੂਰ ਦੀ ਗਤੀਵਿਧੀ ਦਰਸਾਉਂਦੀ ਹੈ ਕਿ ਚੀਨ ਨੇ ਆਪਣੀ ਪਰਮਾਣੂ ਸਥਾਪਨਾ ਦਾ ਵਿਆਪਕ ਤੌਰ 'ਤੇ ਆਧੁਨਿਕੀਕਰਨ ਕੀਤਾ ਹੈ। ਇਸ ਤੋਂ ਇਲਾਵਾ ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਹਥਿਆਰਾਂ ਦੇ ਨਿਰਮਾਣ ਵਿੱਚ ਵਾਧਾ ਹੋ ਸਕਦਾ ਹੈ ਅਤੇ ਸੰਭਵ ਹੈ ਕਿ ਪ੍ਰਮਾਣੂ ਪ੍ਰੀਖਣ ਦਾ ਨਵਾਂ ਦੌਰ ਸ਼ੁਰੂ ਹੋ ਜਾਵੇ।

ਵਿਸ਼ਲੇਸ਼ਕਾਂ ਨੇ ਇਹ ਵੀ ਚੇਤਾਵਨੀ ਦਿੱਤੀ ਹੈ ਕਿ ਚੀਨ ਦੀਆਂ ਹੋਰ ਪਰਮਾਣੂ ਸ਼ਕਤੀਆਂ ਨਾਲ ਮਿਲ ਕੇ ਕੀਤੀਆਂ ਗਈਆਂ ਕਾਰਵਾਈਆਂ 1996 ਦੇ ਗਲੋਬਲ ਟੈਸਟ ਪਾਬੰਦੀ ਨੂੰ ਕਮਜ਼ੋਰ ਕਰ ਸਕਦੀਆਂ ਹਨ। ਅਮਰੀਕਾ ਨਾਲ ਤਣਾਅਪੂਰਨ ਸਬੰਧਾਂ ਦਰਮਿਆਨ ਚੀਨ ਦੀਆਂ ਗਤੀਵਿਧੀਆਂ ਚਿੰਤਾ ਦਾ ਵਿਸ਼ਾ ਹਨ। ਯੂਐਸ ਖੁਫੀਆ ਏਜੰਸੀਆਂ ਨੇ ਸਾਲਾਂ ਤੋਂ ਲੋਪ ਨੂਰ ਬੇਸ ਦੇ ਵਿਕਾਸ ਦੀ ਨਿਗਰਾਨੀ ਕੀਤੀ ਹੈ। ਉਸ ਨੇ ਇੱਥੇ ਉਸਾਰੀ ਨੂੰ ਸਵੀਕਾਰ ਕਰ ਲਿਆ ਹੈ। ਪਰ ਉਹ ਅਜੇ ਵੀ ਇਸਦੇ ਸਹੀ ਉਦੇਸ਼ ਬਾਰੇ ਅਨਿਸ਼ਚਿਤ ਹੈ। ਚੀਨੀ ਵਿਦੇਸ਼ ਮੰਤਰਾਲੇ ਨੇ ਲੋਪ ਨੂਰ ਦੇ ਅਪਗ੍ਰੇਡ ਹੋਣ ਬਾਰੇ ਪੁੱਛੇ ਗਏ ਸਵਾਲ ਨੂੰ ਖਾਰਜ ਕਰ ਦਿੱਤਾ ਅਤੇ ਇਸ ਨੂੰ ਬੇਬੁਨਿਆਦ ਅਤੇ ਡਰ ਪੈਦਾ ਕਰਨ ਵਾਲਾ ਦੱਸਿਆ ਹੈ।

ਦੂਜੇ ਪਾਸੇ ਚੀਨ ਤੇ ਅਮਰੀਕਾ ਦੇ ਵਿਚਾਲੇ ਤਾਈਵਾਨ ਅਤੇ ਦੱਖਣੀ ਚੀਨ ਸਾਗਰ ਦੇ ਹੋਰ ਦੇਸ਼ਾਂ ਫਿਲੀਪੀਨਜ਼  ਨੂੰ ਲੈ ਕੇ ਤਣਾਅ ਵਧਦਾ ਜਾ ਰਿਹਾ ਹੈ। ਅਮਰੀਕੀ ਮਾਹਿਰ ਆਪਣੀ ਸਰਕਾਰ ਨੂੰ ਵਾਰ-ਵਾਰ ਚੇਤਾਵਨੀ ਦੇ ਰਹੇ ਹਨ ਕਿ ਚੀਨ ਤਾਇਵਾਨ ਨੂੰ ਲੈ ਕੇ ਅਮਰੀਕਾ ਨਾਲ ਜੰਗ ਦੀ ਤਿਆਰੀ ਕਰ ਰਿਹਾ ਹੈ। ਹੁਣ ਅਮਰੀਕੀ ਹਵਾਈ ਸੈਨਾ ਨੇ ਚੀਨ ਦੀ ਇਸ ਹਰਕਤ ਨੂੰ ਨਾਕਾਮ ਕਰਨ ਦੀ ਤਿਆਰੀ ਕਰ ਲਈ ਹੈ। ਅਮਰੀਕੀ ਹਵਾਈ ਸੈਨਾ ਪ੍ਰਸ਼ਾਂਤ ਮਹਾਸਾਗਰ ਵਿੱਚ ਇੱਕ ਹੋਰ ਫੌਜੀ ਕਿਲਾ ਬਣਾਉਣ ਜਾ ਰਹੀ ਹੈ। ਇਹ ਨੇਵਲ ਬੇਸ ਤਿਨਿਆਨ ਟਾਪੂ 'ਤੇ ਬਣਾਇਆ ਜਾਵੇਗਾ ਜਿੱਥੋਂ ਅਮਰੀਕਾ ਨੇ ਦੂਜੇ ਵਿਸ਼ਵ ਯੁੱਧ ਦੌਰਾਨ ਜਾਪਾਨੀ ਸ਼ਹਿਰਾਂ ਹੀਰੋਸ਼ੀਮਾ ਅਤੇ ਨਾਗਾਸਾਕੀ 'ਤੇ ਪਰਮਾਣੂ ਬੰਬ ਸੁੱਟੇ ਸਨ।

ਯੂਐਸ ਪ੍ਰਸ਼ਾਂਤ ਏਅਰ ਫੋਰਸ ਬੇੜੇ ਦੇ ਕਮਾਂਡਰ ਜਨਰਲ ਕੇਨੇਥ ਵਿਲਸਵਾਚ ਨੇ ਜਾਪਾਨੀ ਅਖਬਾਰ ਨਿੱਕੇਈ ਏਸ਼ੀਆ ਨਾਲ ਗੱਲਬਾਤ ਵਿੱਚ ਕਿਹਾ ਕਿ ਤਿਨੀਅਨ ਟਾਪੂ 'ਤੇ ਉੱਤਰੀ ਹਵਾਈ ਖੇਤਰ ਦਾ ਵੱਡੇ ਪੱਧਰ 'ਤੇ ਵਿਸਤਾਰ ਕੀਤਾ ਜਾ ਰਿਹਾ ਹੈ। ਅਮਰੀਕਾ ਨੇ 1946 ਦੇ ਪਰਮਾਣੂ ਹਮਲੇ ਤੋਂ ਬਾਅਦ ਪ੍ਰਸ਼ਾਂਤ ਮਹਾਸਾਗਰ ਵਿੱਚ ਇਸ ਟਾਪੂ ਨੂੰ ਖਾਲੀ ਕਰ ਦਿਤਾ ਸੀ। ਇਸ ਸਮੇਂ ਇਸ ਟਾਪੂ 'ਤੇ  ਵੱਡੇ ਪੱਧਰ 'ਤੇ ਜੰਗਲ ਫੈਲਿਆ ਹੋਇਆ ਹੈ। ਉਸ ਨੇ ਕਿਹਾ, 'ਜੇਕਰ ਤੁਸੀਂ ਅਗਲੇ ਕੁਝ ਮਹੀਨਿਆਂ ਵੱਲ ਧਿਆਨ ਦੇਵੋ, ਤਾਂ ਤੁਸੀਂ ਦੇਖੋਗੇ ਕਿ ਬਹੁਤ ਤਰੱਕੀ ਹੋਈ ਹੈ। ਖਾਸ ਕਰਕੇ ਤਿਨਿਅਨ ਦੇ ਉੱਤਰੀ ਖੇਤਰ ਵਿੱਚ।

ਯੂਐਸ ਏਅਰ ਫੋਰਸ ਤਿਨਿਅਨ ਇੰਟਰਨੈਸ਼ਨਲ ਏਅਰਪੋਰਟ ਦਾ ਆਧੁਨਿਕੀਕਰਨ ਕਰ ਰਹੀ ਹੈ, ਜੋ ਕਿ ਟਾਪੂ ਦੇ ਵਿਚਕਾਰ ਹੈ। ਤਿਨਿਅਨ ਉੱਤਰੀ ਮਾਰੀਆਨਾ ਟਾਪੂਆਂ ਦਾ ਹਿੱਸਾ ਹੈ, ਜੋ ਕਿ ਇੱਕ ਯੂਐਸ ਖੇਤਰ ਹੈ। ਇਹ ਹਵਾਈ ਟਾਪੂ ਤੋਂ 6 ਹਜ਼ਾਰ ਕਿਲੋਮੀਟਰ ਦੀ ਦੂਰੀ 'ਤੇ ਹੈ। ਇਸ ਟਾਪੂ 'ਤੇ 3 ਹਜ਼ਾਰ ਲੋਕ ਰਹਿੰਦੇ ਹਨ ਅਤੇ ਇਹ ਸਿਰਫ 100 ਵਰਗ ਕਿਲੋਮੀਟਰ ਵਿਚ ਫੈਲਿਆ ਹੋਇਆ ਹੈ। ਫੌਜ ਨੇ ਇਹ ਨਹੀਂ ਦੱਸਿਆ ਹੈ ਕਿ ਇਹ ਏਅਰ ਬੇਸ ਕਦੋਂ ਪੂਰੀ ਤਰ੍ਹਾਂ ਤਿਆਰ ਹੋਵੇਗਾ। ਤਿਨਿਅਨ ਅਤੇ ਇਸਦੇ ਗੁਆਂਢੀ ਟਾਪੂ ਸਾਈਪਨ ਅਤੇ ਗੁਆਮ ਦਾ ਅਮਰੀਕੀ ਹਵਾਈ ਸੈਨਾ ਦੇ ਇਤਿਹਾਸ ਵਿੱਚ ਇੱਕ ਮਹੱਤਵਪੂਰਨ ਸਥਾਨ ਰਿਹਾ ਹੈ।

ਇਨ੍ਹਾਂ ਤਿੰਨਾਂ ਟਾਪੂਆਂ ਨੂੰ ਅਮਰੀਕਾ ਨੇ ਜਾਪਾਨ ਤੋਂ ਆਪਣੇ ਕਬਜ਼ੇ ਵਿਚ ਲੈ ਲਿਆ ਸੀ। ਦੂਜੇ ਵਿਸ਼ਵ ਯੁੱਧ ਦੌਰਾਨ, ਅਮਰੀਕਾ ਨੇ ਇਨ੍ਹਾਂ ਟਾਪੂਆਂ ਤੋਂ ਆਪਣੇ ਬੀ-29 ਜਹਾਜ਼ਾਂ ਨੂੰ ਬੰਬ ਸੁਟਣ  ਲਈ  ਉਡਾਇਆ ਸੀ ਅਤੇ ਜਾਪਾਨੀ ਖੇਤਰ ਵਿੱਚ ਤਬਾਹੀ ਮਚਾਈ ਸੀ। 10 ਮਾਰਚ 1945 ਨੂੰ ਇੱਥੋਂ ਜਾਪਾਨ ਦੀ ਰਾਜਧਾਨੀ ਟੋਕੀਓ ਉੱਤੇ ਦੁਨੀਆ ਦੇ ਇਤਿਹਾਸ ਵਿੱਚ ਸਭ ਤੋਂ ਵੱਡਾ ਬੰਬ ਧਮਾਕਾ ਕੀਤਾ ਗਿਆ ਸੀ। ਇਸ ਵਿੱਚ 1 ਲੱਖ ਲੋਕ ਮਾਰੇ ਗਏ ਸਨ ਅਤੇ 10 ਲੱਖ ਲੋਕ ਜ਼ਖਮੀ ਹੋਏ ਸਨ। ਇਹ ਬੰਬਾਰੀ ਬੀ-29 ਦੁਆਰਾ ਕੀਤੀ ਗਈ ਸੀ ਅਤੇ ਇਨ੍ਹਾਂ ਨੂੰ ਇਨ੍ਹਾਂ ਤਿੰਨਾਂ ਟਾਪੂਆਂ ਤੋਂ ਲਾਂਚ ਕੀਤਾ ਗਿਆ ਸੀ।

ਜਾਪਾਨੀ ਯੁੱਧ ਦੌਰਾਨ, 40 ਹਜ਼ਾਰ ਸੈਨਿਕ ਤਿਨਿਆਨ ਵਿੱਚ ਤਾਇਨਾਤ ਸਨ ਅਤੇ ਇਹ ਦੁਨੀਆ ਦਾ ਸਭ ਤੋਂ ਵੱਡਾ ਅਤੇ ਵਿਅਸਤ ਹਵਾਈ ਅੱਡਾ ਬਣ ਗਿਆ ਸੀ। ਇੱਥੋਂ ਹੀ 6 ਅਗਸਤ 1945 ਨੂੰ ਅਮਰੀਕਾ ਨੇ ਜਾਪਾਨ ਦੇ ਸ਼ਹਿਰ ਹੀਰੋਸ਼ੀਮਾ 'ਤੇ ਪ੍ਰਮਾਣੂ ਹਮਲਾ ਕੀਤਾ ਸੀ। ਇਸ ਸ਼ੁਰੂਆਤੀ ਧਮਾਕੇ ਵਿਚ 70 ਹਜ਼ਾਰ ਲੋਕ ਤੁਰੰਤ ਮਾਰੇ ਗਏ ਸਨ ਅਤੇ ਦੁਨੀਆ ਪ੍ਰਮਾਣੂ ਯੁੱਧ ਦੀ ਗਵਾਹ ਬਣ ਗਈ ਸੀ। ਤਿੰਨ ਦਿਨ ਬਾਅਦ, ਤਿਨੀਅਨ ਤੋਂ ਹੀ ਜਾਪਾਨ ਦੇ ਨਾਗਾਸਾਕੀ 'ਤੇ ਪ੍ਰਮਾਣੂ ਹਮਲਾ ਕੀਤਾ ਗਿਆ। ਇਸ 'ਚ ਤੁਰੰਤ 46 ਹਜ਼ਾਰ ਲੋਕਾਂ ਦੀ ਮੌਤ ਹੋ ਗਈ ਸੀ।