ਮੁੱਖ ਮੰਤਰੀ ਮਾਨ ਆਪਣੀ ਧੀ ਵਲੋਂ ਲਗਾਏ ਗੰਭੀਰ ਦੋਸ਼ਾਂ ਕਾਰਨ ਧਰਮ ਸੰਕਟ ਵਿੱਚ ਫਸਿਆ

ਜੋ ਕੁਝ ਸਾਡੇ ਨਾਲ ਕੀਤਾ,ਉਹੀ ਉਹ ਪੰਜਾਬ ਦੇ ਲੋਕਾਂ ਨਾਲ ਕਰ ਰਿਹਾ ਏ--ਬੇਟੀ ਸੀਰਤ ਕੌਰ

ਮਜੀਠੀਆ ਦਾ ਮਾਨ 'ਤੇ ਹਮਲਾ! ਜੇ ਜ਼ਿਆਦਾ ਗੁੱਸਾ ਤਾਂ ਸਾਡੇ 'ਤੇ ਕੱਢ ਲਓ, ਆਪਣੇ ਬੱਚਿਆਂ 'ਤੇ ਨਾ ਕੱਢੋ...

ਅੰਮ੍ਰਿਤਸਰ ਟਾਈਮਜ਼ ਬਿਊਰੋ 

ਚੰਡੀਗੜ੍ਹ -ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੀ ਬੇਟੀ ਸੀਰਤ ਕੌਰ ਨੇ ਆਪਣੇ ਪਿਤਾ 'ਤੇ ਕਈ ਗੰਭੀਰ ਦੋਸ਼ ਲਗਾਏ ਹਨ। ਧੀ ਦੇ ਇਲਜ਼ਾਮਾਂ ਅਤੇ ਖੁਲਾਸੇ ਤੋਂ ਬਾਅਦ ਮਾਨ ਦੇ ਅਕਸ ਨੂੰ ਦਾਗ ਲੱਗਾ ਹੈ। ਸਿਆਸੀ ਵਿਰੋਧੀ ਮੁੱਖ ਮੰਤਰੀ ਨੂੰ ਘੇਰ ਰਹੇ ਹਨ। ਇਸ ਬਾਰੇ ਆਮ ਆਦਮੀ ਪਾਰਟੀ (ਆਪ) ਹੁਣ ਤੱਕ ਚੁੱਪ ਹੈ।

ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਬੇਟੀ ਸੀਰਤ ਕੌਰ ਨੇ ਸੋਸ਼ਲ ਮੀਡੀਆ ਰਾਹੀਂ ਸੰਬੋਧਨ ਕਰਦਿਆਂ ਕਿਹਾ ਸੀ ਕਿ ਮੇਰਾ ਨਾਮ ਸੀਰਤ ਕੌਰ ਮਾਨ ਹੈ। ਮੈਂ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਬੇਟੀ ਹਾਂ। ਇੱਕ ਗੱਲ ਮੈਂ ਪਹਿਲਾਂ ਹੀ ਦੱਸਣਾ ਚਾਹੁੰਦੀ ਹਾਂ ਕਿ ਇਸ ਵੀਡੀਓ ਵਿੱਚ ਮੈਂ ਉਹਨਾਂ ਨੂੰ ਕੇਵਲ ਮਾਨ ਜਾਂ ਸੀ.ਐਮ ਸਾਹਿਬ ਹੀ ਕਹਾਂਗੀ। ਉਹ ਬਹੁਤ ਸਮਾਂ ਪਹਿਲਾਂ ਮੈਨੂੰ ਪਿਤਾ ਵਜੋਂ ਸੁਣਨ ਦਾ ਹੱਕ ਗੁਆ ਚੁੱਕਾ ਹੈ। ਮੈਂ ਇਹ ਵੀਡੀਓ ਕਿਸੇ ਰਾਜਨੀਤਿਕ ਉਦੇਸ਼ ਜਾਂ ਕਾਰਨ ਲਈ ਜਾਰੀ ਨਹੀਂ ਕਰ ਰਹੀ ਹਾਂ। ਮੈਂ ਚਾਹੁੰਦੀ ਹਾਂ ਕਿ ਸਾਡੀ ਕਹਾਣੀ ਵੀ ਅੱਗੇ ਆਵੇ।''

ਸੀਰਤ ਕੌਰ ਨੇ ਅੱਗੇ ਕਿਹਾ ਕਿ ਅੱਜ ਤੱਕ ਜੋ ਵੀ ਲੋਕਾਂ ਦੇ ਸਾਹਮਣੇ ਆਇਆ ਹੈ, ਉਹ ਮੁੱਖ ਮੰਤਰੀ ਸਾਹਿਬ ਦੇ ਸ਼ਬਦਾਂ ਰਾਹੀਂ ਆਇਆ ਹੈ। ਇਸ ਕਾਰਨ ਸਾਨੂੰ ਦੁੱਖ ਝੱਲਣਾ ਪਿਆ; ਇਹ ਅਸਹਿ ਹੈ। ਅੱਜ ਤੱਕ ਅਸੀਂ ਚੁੱਪ ਰਹੇ ਅਤੇ ਮੇਰੀ ਮਾਂ ਵੀ ਚੁੱਪ ਹੈ, ਮੈਨੂੰ ਲੱਗਦਾ ਹੈ ਕਿ ਉਨ੍ਹਾਂ ਨੇ ਸਮਝ ਲਿਆ ਹੈ ਕਿ ਸਾਡੀ ਚੁੱਪ ਹੀ ਸਾਡੀ ਕਮਜ਼ੋਰੀ ਹੈ। ਉਹ ਨਹੀਂ ਜਾਣਦੇ ਕਿ ਉਹ ਸਾਡੀ ਚੁੱਪ ਕਾਰਨ ਇਸ ਅਹੁਦੇ 'ਤੇ ਬਿਰਾਜਮਾਨ ਹੈ। ਸਭ ਤੋਂ ਪਹਿਲਾਂ ਮੈਂ ਇਹ ਕਹਿਣਾ ਚਾਹਾਂਗੀ ਕਿ ਮਾਨ ਦੀ ਨਵੀਂ ਪਤਨੀ ਡਾ: ਗੁਰਪ੍ਰੀਤ ਗਰਭਵਤੀ ਹੈ। ਉਹ ਤੀਜੀ ਵਾਰ ਪਿਤਾ ਬਣਨ ਜਾ ਰਹੇ ਹਨ। ਮੈਨੂੰ ਲੋਕਾਂ ਤੋਂ ਇਹ ਪਤਾ ਲੱਗਾ ਹੈ।''

ਮੁੱਖ ਮੰਤਰੀ ਨੂੰ ਸੰਬੋਧਿਤ ਕਰਦੇ ਹੋਏ ਉਨ੍ਹਾਂ ਦੀ ਧੀ ਨੇ ਕਿਹਾ, “ਮੈਂਨੂੰ ਤੁਸੀਂ ਦੱਸਣਾ ਜ਼ਰੂਰੀ ਨਹੀਂ ਸਮਝਿਆ ਅਤੇ ਨਾ ਹੀ ਆਪਣੇ ਬੇਟੇ ਦਿਲਸ਼ਾਨ ਨੂੰ। ਮੈਂ ਪੁੱਛਣਾ ਚਾਹੁੰਦੀ ਹਾਂ ਕਿ ਜੋ ਦੋ ਤੁਹਾਡੇ ਦੋ ਬੱਚੇ ਹਨ, ਮੇਰੀ ਉਮਰ 23 ਸਾਲ ਹੈ ਅਤੇ ਮੇਰਾ ਭਰਾ 19 ਸਾਲ ਦਾ ਹੋਣ ਵਾਲਾ ਹੈ - ਤੁਸੀਂ ਉਨ੍ਹਾਂ ਨੂੰ ਭੁੱਲਾ ਦਿਤਾ ਅਤੇ ਉਨ੍ਹਾਂ ਦੀ ਬਾਪ ਵਜੋਂ ਜ਼ਿੰਮੇਵਾਰੀ ਨਹੀਂ ਨਿਭਾਈ, ਫਿਰ ਤੁਸੀਂ ਦੂਜੇ ਬੱਚੇ ਨੂੰ ਜੰਮਣ ਲਗੇ ਹੋ? ਇਸ ਦੇ ਪਿੱਛੇ ਕੀ ਕਾਰਨ ਹੈ? 

ਵੀਡੀਓ ਵਿੱਚ ਸੀਰਤ ਕਹਿੰਦੀ ਹੈ, “ਦਿਲਸ਼ਾਨ ਆਪਣੇ ਪਿਤਾ ਨਾਲ ਸਮਾਂ ਬਿਤਾਉਣ ਲਈ ਪਿਛਲੇ ਸਾਲ ਦੋ ਵਾਰ ਚੰਡੀਗੜ੍ਹ ਗਿਆ ਸੀ ਪਰ ਮੁੱਖ ਮੰਤਰੀ ਨੇ ਉਸ ਨੂੰ ਸੀਐਮ ਹਾਊਸ ਨਹੀਂ ਆਉਣ ਦਿੱਤਾ। ਉਹ ਆਪਣੇ ਦੋਸਤਾਂ ਨਾਲ ਰਿਹਾ। ਇਕ ਦਿਨ ਜਦੋਂ ਉਹ ਮੁੱਖ ਮੰਤਰੀ ਦੀ ਰਿਹਾਇਸ਼ 'ਤੇ ਗਿਆ ਤਾਂ ਅੱਧੀ ਰਾਤ ਨੂੰ ਇਹ ਕਹਿ ਕੇ ਘਰੋਂ ਬਾਹਰ ਕੱਢ ਦਿੱਤਾ ਗਿਆ ਕਿ ਇੱਥੋਂ ਚਲੇ ਜਾਓ, ਤੁਸੀਂ ਇੱਥੇ ਨਹੀਂ ਰਹਿ ਸਕਦੇ। ਜੋ ਆਪਣੇ ਬੱਚਿਆਂ ਦੀ ਜਿੰਮੇਵਾਰੀ ਨਹੀਂ ਚੁੱਕ ਸਕਦਾ, ਉਹ ਪੰਜਾਬ ਦੇ ਲੋਕਾਂ ਦੀ ਜਿੰਮੇਵਾਰੀ ਕਿਵੇਂ ਲਵੇਗਾ? ਜੋ ਕੁਝ ਅਸੀਂ ਆਪਣੀ ਜ਼ਿੰਦਗੀ ਵਿਚ ਦੇਖਿਆ, ਉਹੀ ਉਹ ਪੰਜਾਬ ਦੇ ਲੋਕਾਂ ਦਾ ਕਰ ਰਿਹਾ ਹੈ।

ਸੀਰਤ ਮੁਤਾਬਕ, “ਤਲਾਕ ਦਾ ਕਾਰਨ ਇਹ ਦੱਸਿਆ ਗਿਆ ਸੀ ਕਿ ਮੇਰੀ ਪਤਨੀ ਨਹੀਂ ਚਾਹੁੰਦੀ ਕਿ ਮੈਂ ਰਾਜਨੀਤੀ ਵਿੱਚ ਆਵਾਂ। ਤਲਾਕ ਦੇ ਕਈ ਕਾਰਨ ਹਨ। ਇਹ ਮੇਰੀ ਮਾਂ ਦੀ ਕਹਾਣੀ ਹੈ, ਜਦੋਂ ਉਹ ਇਹ ਦੱਸਣ ਲਈ ਤਿਆਰ ਹੋਵੇਗੀ ਤਾਂ ਉਹ ਜ਼ਰੂਰ ਦੱਸੇਗੀ। ਆਓ ਤੁਹਾਨੂੰ ਕੁਝ ਕਾਰਨ ਦੱਸਦੇ ਹਾਂ। ਸ਼ਰਾਬ ਪੀਣਾ, ਝੂਠ ਬੋਲਣਾ ਤੇ ਮੇਰੀ ਮਾਂ ਦਾ ਸਰੀਰਕ ਸ਼ੋਸ਼ਣ ਕਰਨਾ।"

ਮੁੱਖ ਮੰਤਰੀ ਭਗਵੰਤ ਮਾਨ 'ਤੇ ਗੰਭੀਰ ਦੋਸ਼ ਲਗਾਉਂਦੇ ਹੋਏ ਉਨ੍ਹਾਂ ਦੀ ਬੇਟੀ ਨੇ ਕਿਹਾ, ''ਅੱਜ ਵੀ ਉਹ ਸ਼ਰਾਬ ਪੀ ਕੇ ਕਦੇ ਅਸੈਂਬਲੀ, ਕਦੇ ਗੁਰਦੁਆਰੇ ਅਤੇ ਕਦੇ ਪ੍ਰੈੱਸ ਕਾਨਫਰੰਸ ਵਿਚ ਜਾਂਦੇ ਹਨ। ਮੈਨੂੰ ਨਹੀਂ ਪਤਾ ਕਿ ਇਹ ਕਿਹੋ ਜਿਹੀ ਆਦਤ ਹੈ। ਉਹ ਸਾਡੇ ਨਾਲ ਇਮੋਸ਼ਨਲ ਬਲੈਕਮੇਲਿੰਗ ਕਰਦਾ ਰਿਹਾ। ਕਦੇ ਰੋ ਕੇ ਤੇ ਕਦੇ ਮਾਫੀ ਮੰਗ ਕੇ।ਸੀਰਤ ਨੇ ਕਿਹਾ, ''ਅੱਜ ਮੈਂ ਦੇਖਦੀ ਹਾਂ ਕਿ ਉਹ ਕਦੇ ਕਿਸੇ ਬੇਟੀ ਨੂੰ ਜੱਫੀ ਪਾ ਕੇ ਰੋਂਦਾ ਹੈ ਅਤੇ ਕਦੇ ਕਿਸੇ ਔਰਤ ਨੂੰ। ਉਹੀ ਇਮੋਸ਼ਨਲ ਬਲੈਕਮੇਲਿੰਗ ਪੰਜਾਬ ਦੇ ਲੋਕਾਂ ਨਾਲ ਕੀਤੀ ਜਾ ਰਹੀ ਹੈ। ਹਮਦਰਦੀ ਹਾਸਲ ਕਰਨ ਲਈ, ਆਪਣੇ ਫਾਇਦੇ ਲਈ।''

ਬੇਟੀ ਨੇ ਕਿਹਾ, ''ਬਹੁਤ ਸਾਰੀਆਂ ਗੱਲਾਂ ਹਨ ਅਤੇ ਮੈਨੂੰ ਉਨ੍ਹਾਂ ਨੂੰ ਦੱਸਣ ਵਿਚ ਕਈ ਘੰਟੇ ਲੱਗ ਜਾਣਗੇ, ਪਰ ਮੈਂ ਸਿਰਫ ਇਹ ਬੇਨਤੀ ਕਰਨਾ ਚਾਹੁੰਦੀ ਹਾਂ ਕਿ ਸਾਡਾ ਨਾਂ ਉਨ੍ਹਾਂ ਨਾਲ ਨਾ ਜੋੜਿਆ ਜਾਵੇ। ਉਸ ਨੇ ਸਪੱਸ਼ਟ ਕੀਤਾ ਹੈ ਕਿ ਅਸੀਂ ਉਸ ਦੇ ਪਰਿਵਾਰ ਨਾਲ ਸਬੰਧਤ ਨਹੀਂ ਹਾਂ, ਮੈਂ ਅਤੇ ਮੇਰਾ ਭਰਾ ਉਸ ਦੇ ਪਰਿਵਾਰ ਦਾ ਹਿੱਸਾ ਨਹੀਂ ਹਾਂ। ਉਨ੍ਹਾਂ ਦਾ ਪਰਿਵਾਰ ਹੁਣ ਦੁਬਾਰਾ ਸ਼ੁਰੂ ਹੋ ਰਿਹਾ ਹੈ। ”

ਜਾਰੀ ਕੀਤੀ ਵੀਡੀਓ ਵਿੱਚ ਆਪਣੇ ਪਿਤਾ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਸੰਬੋਧਨ ਕਰਦਿਆਂ ਸੀਰਤ ਕੌਰ ਕਹਿੰਦੀ ਹੈ, “ਮਾਨ ਜੀ, ਵਧਾਈਆਂ! ਤੁਸੀਂ ਦੁਬਾਰਾ ਪਿਤਾ ਬਣਨ ਜਾ ਰਹੇ ਹੋ। ਮੈਂ ਸਿਰਫ ਇਹੀ ਅਰਦਾਸ ਕਰ ਸਕਦੀ ਹਾਂ ਕਿ ਉਹਨਾਂ ਬੱਚਿਆਂ ਦੀ ਜ਼ਿੰਦਗੀ ਸਾਡੇ ਨਾਲੋਂ ਵਧੀਆ ਹੋਵੇ, ਤਾਂ ਜੋ ਤੁਸੀਂ ਉਹਨਾਂ ਬੱਚਿਆਂ ਦੇ ਚੰਗੇ ਪਿਤਾ ਸਾਬਤ ਹੋਵੋ।

ਮੈਂ ਤੁਹਾਨੂੰ ਬੇਨਤੀ ਕਰਨਾ ਚਾਹਾਂਗੀ ਕਿ ਤੁਸੀਂ ਪੰਜਾਬ ਦੇ ਬੱਚਿਆਂ ਲਈ, ਪੰਜਾਬ ਦੀਆਂ ਮਾਵਾਂ-ਭੈਣਾਂ ਲਈ ਕੁਝ ਕਰੋ, ਜਿਨ੍ਹਾਂ ਲਈ ਤੁਸੀਂ ਆਪਣਾ ਪਰਿਵਾਰ ਛੱਡਿਆ ਸੀ। ਜ਼ੁੰਮੇਵਾਰੀ ਲਓ ਅਤੇ ਹੋ ਸਕਦਾ ਹੈ ਕਿ ਤੁਹਾਨੂੰ ਮਾਫ਼ੀ ਮਿਲ ਜਾਵੇ। ਜੋ ਕੁਝ ਤੁਸੀਂ ਸਾਡੇ ਨਾਲ ਕੀਤਾ ਉਸ ਲਈ ਤੁਹਾਨੂੰ ਮਾਫ਼ ਕੀਤਾ ਜਾਵੇ।

ਸੂਬੇ ਦੀ ਸਿਆਸਤ ਗਰਮਾਈ

ਮੁੱਖ ਮੰਤਰੀ ਦੀ ਧੀ ਦੀ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਸੂਬੇ ਦੀ ਸਿਆਸਤ ਗਰਮਾ ਗਈ ਹੈ। ਸ਼੍ਰੋਮਣੀ ਅਕਾਲੀ ਦਲ ਦੇ ਸੀਨੀਅਰ ਆਗੂ ਅਤੇ ਸਾਬਕਾ ਮੰਤਰੀ ਬਿਕਰਮਜੀਤ ਸਿੰਘ ਮਜੀਠੀਆ ਨੇ ਕਿਹਾ, “ਸੀਰਤ ਕੌਰ ਦੀ ਵੀਡੀਓ ਨੇ ਭਗਵੰਤ ਮਾਨ ਦੀ ਅਸਲੀਅਤ ਦਾ ਖੁਲਾਸਾ ਕਰ ਦਿੱਤਾ ਹੈ। ਕਿਸੇ ਹੋਰ ਦਾ ਕੀ ਹੋਵੇਗਾ ਜੇ ਉਹ ਆਪਣੇ ਬੱਚਿਆਂ ਦਾ ਨਹੀਂ ਹੈ? ਮੁੱਖ ਮੰਤਰੀ ਦਾ ਅਸਲ ਚਰਿੱਤਰ ਉਹੀ ਹੈ ਜੋ ਉਨ੍ਹਾਂ ਦੀ ਧੀ ਨੇ ਬਿਆਨ ਕੀਤਾ ਹੈ।

ਸ਼੍ਰੋਮਣੀ ਅਕਾਲੀ ਦਲ ਦੇ ਜਨਰਲ ਸਕੱਤਰ ਜਗਦੀਪ ਸਿੰਘ ਚੀਮਾ ਦੇ ਅਨੁਸਾਰ, "ਜੇਕਰ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਆਪਣੇ ਪਰਿਵਾਰ ਦਾ ਧਿਆਨ ਰੱਖਿਆ ਹੁੰਦਾ ਤਾਂ ਅੱਜ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰ ਜਨਤਕ ਤੌਰ 'ਤੇ ਨਾ ਬੋਲਦੇ।"

ਆਮ ਆਦਮੀ ਪਾਰਟੀ ਦਾ ਕੋਈ ਵੀ ਵੱਡਾ ਜਾਂ ਛੋਟਾ ਆਗੂ ਇਸ ਮੁੱਦੇ 'ਤੇ ਪ੍ਰਤੀਕਿਰਿਆ ਦੇਣ ਲਈ ਤਿਆਰ ਨਹੀਂ ਹੈ। ਮਾਮਲਾ ਕੁਝ ਵੀ ਹੋਵੇ, ਆਪਣੀ ਧੀ ਵੱਲੋਂ ਲਾਏ ਅਜਿਹੇ ਗੰਭੀਰ ਦੋਸ਼ਾਂ ਤੋਂ ਬਾਅਦ ਭਗਵੰਤ ਮਾਨ ਨੂੰ ਜਲਦੀ ਜਾਂ ਬਾਅਦ ਵਿੱਚ ਆਪਣਾ ਮੂੰਹ ਖੋਲ੍ਹਣਾ ਹੀ ਪਵੇਗਾ। ਉਨ੍ਹਾਂ ਲਈ ਇਹ ਵੀ ਮੁਸੀਬਤ ਬਣੀ ਹੋਈ ਹੈ ਕਿ ਸੀਰਤ ਕੌਰ ਨੇ ਸਾਫ਼ ਕਹਿ ਦਿੱਤਾ ਹੈ ਕਿ ਸਮਾਂ ਆਉਣ 'ਤੇ ਉਨ੍ਹਾਂ ਦੀ ਮਾਂ ਭਾਵ ਮੁੱਖ ਮੰਤਰੀ ਦੀ ਪਹਿਲੀ ਪਤਨੀ ਵੀ ਬੋਲੇਗੀ।

ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਇਸ ਵੇਲੇ ਆਪਣੇ ਪਰਿਵਾਰ ਦੇ ਇਲਜ਼ਾਮਾਂ ਵਿੱਚ ਬੁਰੀ ਤਰ੍ਹਾਂ ਨਾਲ ਉਲਝ ਗਏ ਹਨ। ਬੀਤੇ ਦਿਨ ਮਾਨ ਦੀ ਧੀ ਵੱਲੋਂ ਵੱਡੇ ਇਲਜ਼ਾਮ ਲਾਏ ਗਏ ਸੀ ਜਿਸ ਤੋਂ ਬਾਅਦ ਹੁਣ ਉਨ੍ਹਾਂ ਦੀ ਸਾਬਕਾ ਪਤਨੀ ਵੱਲੋਂ ਸ਼ਰੇਆਮ ਧਮਕੀ ਦਿੱਤੀ ਗਈ ਹੈ।

ਪਤਨੀ ਦੀ ਧਮਕੀ

ਮੁੱਖ ਮੰਤਰੀ ਮਾਨ ਦੀ ਪਹਿਲੀ ਪਤਨੀ ਨੇ ਸੋਸ਼ਲ ਮੀਡੀਆ ਉੱਤੇ ਪੋਸਟ ਪਾ ਕੇ ਭਗਵੰਤ ਮਾਨ ਦੇ ਸਮਰਥਕਾਂ ਨੂੰ ਤਾੜਨਾ ਕਰਦਿਆਂ ਲਿਖਿਆ, ਕਿ ਮੈਂ ਡਰ ਡੁਰ ਤੋੜ ਕੇ ਸਮੁੰਦਰ ਵਿਚ ਸੁੱਟ ਚੁੱਕੀ ਹਾਂ। ਮੈ ਡਰਦੀ ਨਹੀਂ ਲਿਹਾਜ਼ ਸੀ ।ਬਸ ਜਿਹਨੇ ਬਿਨਾਂ ਮਤਲਬ ਦੀ ਬਕਵਾਸ ਕੀਤੀ ਇੱਕ ਫੋਟੋ ਫੇਸਬੁੱਕ ਤੇ ਪਾ ਦਿਆ ਕਰਨੀ ਮੈ ਸ਼ਰਾਬੀ ਦੀ ,ਫਿਰ ਚੰਗਾ ਰਹੂ ਆਪਣੀ ਇੱਜਤ ਢਕੀ ਰੱਖੇ ਨਾਲੇ ਓਹਦੇ ਚਮਚੇ ,ਕੜਛੀਆ ਮੈਨੂੰ ਆਪ ਹੀ ਅਨਫਰੈਂਡ ਕਰ ਦੇਣ ਜੇ ਥੋਡੇ ਤੋਂ ਦੇਖ ਨੀ ਹੁੰਦਾ।