ਸਿੱਖਾਂ ਨੇ ਮਹਾਰਾਸ਼ਟਰ ਵਿੱਚ ਸਹਿਮੀਆਂ ਬੈਠੀਆਂ ਕਸ਼ਮੀਰੀ ਕੁੜੀਆਂ ਨੂੰ ਸੁਰੱਖਿਅਤ ਸ਼੍ਰੀਨਗਰ ਪਹੁੰਚਾਇਆ

ਚੰਡੀਗੜ੍ਹ: ਭਾਵੇਂ ਬਿਪਰਵਾਦੀ ਰਾਜ ਪ੍ਰਬੰਧ ਅਧੀਨ ਵਿਚਰ ਰਹੀ ਸਿੱਖ ਕੌਮ ਕੁੱਝ ਪੱਖਾਂ ਤੋਂ ਥਿੜਕੀ ਪ੍ਰਤੀਤ ਹੁੰਦੀ ਹੈ ਪਰ ਅੱਜ ਵੀ ਉਹ ਆਪਣੀ ਮਾਨਵਤਾਵਾਦੀ ਵਿਲੱਖਣਤਾ ਨੂੰ ਇਸ ਬਿਪਰਵਾਦੀ ਪ੍ਰਛਾਵੇਂ ਹੇਠ ਵੀ ਜਿਉਂਦਾ ਰੱਖ ਕੇ ਚੜ੍ਹਦੀਕਲਾ ਦੀ ਇੱਛਾ ਆਪਣੇ ਦਿਲਾਂ ਅੰਦਰ ਸਮੋਈ ਬੈਠੀ ਹੈ। ਇਸ ਗੱਲ ਦਾ ਝਲਕਾਰਾ ਸਮੇਂ ਦਰ ਸਮੇਂ ਸਿੱਖ ਸਮਾਜ ਦੀਆਂ ਸੇਵਾਵਾਂ ਵਿੱਚੋਂ ਨਜ਼ਰ ਪੈਂਦਾ ਰਹਿੰਦਾ ਹੈ। ਅਜਿਹਾ ਹੀ ਭਾਰਤ ਸਰਕਾਰ ਦੇ ਸਤਾਏ ਕਸ਼ਮੀਰੀਆਂ ਦੇ ਮਾਮਲੇ ਵਿੱਚ ਮਜ਼ਲੂਮ ਕਸ਼ਮੀਰੀਆਂ ਨਾਲ ਖੜ੍ਹ ਕੇ ਸਿੱਖ ਕੌਮ ਦੁਨੀਆ ਨੂੰ ਨਵਾਂ ਸੁਨੇਹਾ ਦੇ ਰਹੀ ਹੈ। 

ਜਿੱਥੇ ਇੱਕ ਪਾਸੇ ਭਾਰਤ ਦੇ ਹਿੰਦੀ ਖੇਤਰੀ ਲੋਕ ਕਸ਼ਮੀਰੀ ਔਰਤਾਂ ਪ੍ਰਤੀ ਭੱਦੀਆਂ ਟਿੱਪਣੀਆਂ ਕਰ ਰਹੇ ਹਨ ਤਾਂ ਉੱਥੇ ਮਹਾਰਾਸ਼ਟਰ ਵਿੱਚ ਡਰ ਸਹਿਮ ਦੇ ਮਾਹੌਲ 'ਚ ਘਿਰੀਆਂ ਹੋਈਆਂ 34 ਕਸ਼ਮੀਰੀ ਕੁੜੀਆਂ ਨੂੰ ਸਿੱਖ ਸੰਗਤ ਨੇ ਉਹਨਾਂ ਦੇ ਘਰਾਂ ਤੱਕ ਪਹੁੰਚਾਇਆ ਹੈ। 

ਕਸ਼ਮੀਰੀ ਕੁੜੀਆਂ ਨੂੰ ਘਰੋ-ਘਰੀ ਪਹੁੰਚਾਉਣ ਮੌਕੇ ਲਈ ਗਈ ਤਸਵੀਰ
ਸਿੱਖ ਸੰਗਤ ਨੇ ਦਸਵੰਧ ਦੇ 4 ਲੱਖ ਰੁਪਏ ਇਕੱਤਰ ਕੀਤੇ ਅਤੇ ਇਹਨਾਂ ਕਸ਼ਮੀਰੀ ਕੁੜੀਆਂ ਨੂੰ ਜਹਾਜ਼ ਰਾਹੀਂ ਸ਼੍ਰੀਨਗਰ ਪਹੁੰਚਾਇਆ। 

ਦਿੱਲੀ ਦੇ ਸਿੱਖ ਆਗੂ ਹਰਮਿੰਦਰ ਸਿੰਘ ਅਤੇ 3 ਹੋਰ ਸਿੱਖ ਇਹਨਾਂ ਬੱਚੀਆਂ ਨਾਲ ਗਏ ਤੇ ਉਹਨਾਂ ਨੂੰ ਸ਼੍ਰੀਨਗਰ ਉਹਨਾਂ ਦੇ ਘਰ ਪਹੁੰਚਾਇਆ। 

ਦੱਸ ਦਈਏ ਕਿ ਸਿੱਖ ਇਤਿਹਾਸ ਇਸ ਗੱਲ ਦਾ ਗਵਾਹ ਹੈ ਕਿ ਸਿੱਖ ਕੌਮ ਹਮੇਸ਼ਾ ਜ਼ਾਲਮ ਦੇ ਖਿਲਾਫ ਅਤੇ ਮਜ਼ਲੂਮ ਦੇ ਨਾਲ ਖੜ੍ਹਦੀ ਹੈ। ਇਤਿਹਾਸ ਵਿੱਚ ਵੀ ਜਦੋਂ ਅਫਗਾਨ ਹਾਕਮ ਭਾਰਤ ਦੀਆਂ ਹਿੰਦੂ ਔਰਤਾਂ ਨੂੰ ਗੁਲਾਮ ਬਣਾ ਕੇ ਲਿਜਾਂਉਂਦੇ ਸਨ ਤਾਂ ਸਿੱਖ ਜੁਝਾਰੂ ਇਹਨਾਂ ਹਿੰਦੂ ਬੀਬੀਆਂ ਨੂੰ ਉਹਨਾਂ ਤੋਂ ਛਡਵਾ ਕੇ ਉਹਨਾਂ ਬੀਬੀਆਂ ਦੇ ਘਰਾਂ ਤੱਕ ਪਹੁੰਚਾਉਂਦੇ ਸਨ।