ਇੰਟਰਨੈਸ਼ਨਲ ਇੰਸਟੀਚਿਊਟ ਆਫ਼ ਪਾਪੁਲੇਸ਼ਨ ਸਾਇੰਸੇਜ਼  ਨੇ ਪੇਸ਼ ਕੀਤੇ ਅੰਕੜੇ  

ਪਤਨੀਆਂ ਵੀ ਕੁਟਦੀਆਂ ਹਨ ਆਪਣੇ ਪਤੀਆਂ ਨੂੰ

10 ਸਾਲਾਂ ਵਿਚ 4 ਗੁਣਾ  ਮਾਮਲਿਆਂ ਵਿਚ ਹੋਇਆ ਵਾਧਾ

ਅੰਮ੍ਰਿਤਸਰ ਟਾਈਮਜ਼ ਬਿਊਰੋ 

ਨਵੀਂ ਦਿੱਲੀ- ਅਕਸਰ ਇਹ ਗੱਲ ਸੁਣਨ ਨੂੰ ਮਿਲਦੀ ਹੈ ਕਿ ਔਰਤਾਂ ਆਪਣੇ ਪਤੀ ਹੱਥੋਂ ਹਿੰਸਾ ਦਾ ਸ਼ਿਕਾਰ ਜ਼ਿਆਦਾ ਹੁੰਦੀਆਂ ਹਨ ਪਰ ਹੁਣ ਸਭ ਉਲਟ ਹੋ ਰਿਹਾ ਹੈ। ਪਤਨੀਆਂ ਤੋਂ ਕੁੱਟਮਾਰ ਦਾ ਸ਼ਿਕਾਰ ਹੁਣ ਪਤੀ ਹੋ ਰਹੇ ਹਨ। ਇੰਟਰਨੈਸ਼ਨਲ ਇੰਸਟੀਚਿਊਟ ਆਫ਼ ਪਾਪੁਲੇਸ਼ਨ ਸਾਇੰਸੇਜ਼ ਦੇ ਇਕ ਅਧਿਐਨ 'ਚ ਹੈਰਾਨ ਕਰਨ ਵਾਲੇ ਅੰਕੜੇ ਸਾਹਮਣੇ ਆਏ ਹਨ। ਅੰਕੜਿਆਂ ਵਿਚ ਵੇਖਿਆ ਗਿਆ ਕਿ ਪਤਨੀਆਂ ਦੇ ਹੱਥੋਂ ਹਿੰਸਾ ਦਾ ਸ਼ਿਕਾਰ ਹੋਣ ਵਾਲੇ ਪਤੀ ਦੇ ਮਾਮਲੇ 10 ਸਾਲਾਂ ਵਿਚ 4 ਗੁਣਾ ਵੱਧ ਗਏ। 

ਹਿੰਦੂ, ਬੌਧ, ਸਿੱਖ, ਈਸਾਈ ਔਰਤਾਂ ਪਤੀਆਂ 'ਤੇ ਹੱਥ ਚੁੱਕਣ ਦੇ ਮਾਮਲੇ ਵਿਚ ਹਰ 1000 ਵਿਚੋਂ 30 ਹਨ। ਇਕੱਲੇ ਪਰਿਵਾਰ ਦੇ ਮੁਕਾਬਲੇ ਸਾਂਝੇ ਪਰਿਵਾਰ ਵਿਚ ਪਤੀਆਂ ਖਿਲਾਫ਼ ਔਰਤਾਂ ਦੀ ਹਿੰਸਾ ਘੱਟ ਹੁੰਦੀ ਹੈ। ਅਮੀਰ ਦੇ ਮੁਕਾਬਲੇ ਗਰੀਬ ਪਤੀ, ਪਤਨੀ ਹੱਥੋਂ ਲੱਗਭਗ ਦੁੱਗਣੀ ਗਿਣਤੀ ਵਿਚ ਕੁੱਟਮਾਰ ਦਾ ਸ਼ਿਕਾਰ ਹੋ ਰਹੇ ਹਨ। ਪਤਨੀ ਤੋਂ ਕੁੱਟਮਾਰ ਦਾ ਸ਼ਿਕਾਰ ਹਰ ਇਕ ਹਜ਼ਾਰ ਵਿਚ 56 ਪਤੀ ਸ਼ਰਾਬ ਪੀਣ ਵਾਲੇ ਹੁੰਦੇ ਹਨ, ਸ਼ਰਾਬ ਨਾ ਪੀਣ ਵਾਲੇ ਸਿਰਫ਼ 17 ਹੀ ਹਨ।

ਪਤਨੀਆਂ ਨੂੰ ਇਸ ਲਈ ਆਉਂਦਾ ਹੈ ਗੁੱਸਾ-

ਪਤਨੀ ਦਿਨ ਦਾ ਸਮਾਂ ਕਦੋਂ ਅਤੇ ਕਿੱਥੇ ਬਿਤਾ ਰਹੀ ਹੈ, ਪਤੀ ਇਸ ਦਾ ਪੂਰਾ ਹਿਸਾਬ ਮੰਗਦਾ ਰਹੇ। 

ਪਤੀ ਜੇਕਰ ਪੈਸਿਆਂ ਦੇ ਮਾਮਲੇ 'ਚ ਪਤਨੀ 'ਤੇ ਯਕੀਨ ਨਾ ਕਰੇ। ਫਜ਼ੂਲ ਖਰਚ ਦਾ ਦੋਸ਼ ਲਾਏ।

ਪਤਨੀ ਦੇ ਕਿਸੇ ਹੋਰ ਮਰਦ ਨਾਲ ਗੱਲ ਕਰਨ 'ਤੇ ਪਤੀ ਚਿੜ ਜਾਣ ਜਾਂ ਫਿਰ ਬੇਵਜ੍ਹਾ ਹੀ ਗੁੱਸਾ ਕਰਨ। 

ਪਤਨੀ ਆਪਣੀਆਂ ਸਹੇਲੀਆਂ ਜਾਂ ਫਿਰ ਰਿਸ਼ੇਤਦਾਰਾਂ ਨੂੰ ਮਿਲਣ ਲਈ ਆਖੇ ਅਤੇ ਇਹ ਗੱਲ ਪਤੀ ਨਾ ਮੰਨੇ। 

ਪਤਨੀ ਪੇਕੇ ਵਾਲਿਆਂ ਨੂੰ ਮਿਲਣ ਲਈ ਆਖੇ ਅਤੇ ਪਤੀ ਉਸ ਨੂੰ ਰੋਕਣ ਦੀ ਕੋਸ਼ਿਸ਼ ਕਰੇ। 

ਪਤੀ ਜੇਕਰ ਬਿਨਾਂ ਕਾਰਨ ਹੀ ਪਤਨੀ 'ਤੇ ਬੇਵਫਾਈ ਕਰਨ ਦਾ ਦੋਸ਼ ਲਾਏ।