ਅਮਰੀਕਾ ਵਿਚ 35 ਸਾਲ ਪਹਿਲਾਂ ਬੱਚੇ ਦੀ ਹੋਈ ਮੌਤ ਦੇ ਮਾਮਲੇ ਵਿਚ ਪਿਤਾ ਤੇ ਮਤਰੇਈ ਮਾਂ ਬਰੀ

ਅੰਮ੍ਰਿਤਸਰ ਟਾਇਮਜ਼ ਬਿਊਰੋ

ਸੈਕਰਾਮੈਂਟੋ, ਕੈਲੀਫੋਰਨੀਆ (ਹੁਸਨ ਲੜੋਆ ਬੰਗਾ)-ਅਮਰੀਕਾ ਦੇ ਸਾਊਥ ਕੈਰੋਲੀਨਾ ਰਾਜ ਦੀ ਇਕ ਅਦਾਲਤ ਵੱਲੋਂ 1989 ਵਿਚ ਇਕ 5 ਸਾਲਾ ਬੱਚੇ ਜਸਟਿਨ ਲੀ ਟਰਨਰ ਦੀ ਹੋਈ ਮੌਤ ਦੇ  ਮਾਮਲੇ ਵਿਚ ਪਿੱਤਾ ਤੇ ਮਤਰੇਈ ਮਾਂ ਨੂੰ ਬਰੀ ਕਰ ਦੇਣ ਦੀ ਰਿਪੋਰਟ ਹੈ। ਤਕਰੀਬਨ 35 ਸਾਲ ਬਾਅਦ ਬੱਚੇ ਦੇ ਪਿਤਾ ਵਿਕਟਰ ਲੀ ਟਰਨਰ ਤੇ ਮਤਰੇਈ ਮਾ ਮੇਗਨ ਰੇਨੀ ਟਰਨਰ ਨੂੰ ਇਸ ਸਾਲ ਜਨਵਰੀ ਵਿਚ ਗ੍ਰਿਫਤਾਰ ਕਰਕੇ ਉਨਾਂ ਵਿਰੁੱਧ ਹੱਤਿਆ ਦੇ ਦੋਸ਼ ਆਇਦ ਕੀਤੇ ਗਏ ਸਨ।  ਬੱਚੇ ਦੀ ਲਾਸ਼ ਪਰਿਵਾਰ ਦੇ ਘਰ ਨੇੜਿਉਂ ਮਿਲੀ ਸੀ। ਸਰਕਟ ਜੱਜ ਰੋਜਰ ਯੰਗ ਨੇ ਸਬੂਤਾਂ ਦੀ ਵਿਵਹਾਰਕਤਾ 'ਤੇ ਸਵਾਲ ਉਠਾਏ ਤੇ ਠੋਸ ਸਬੂਤਾਂ ਦੀ  ਅਣਹੋਂਦ ਵਿਚ ਦੋਨਾਂ ਨੂੰ ਬਰੀ ਕਰ ਦਿੱਤਾ। ਜੱਜ ਨੇ ਦੋਨਾਂ ਨੂੰ ਦੁਬਾਰਾ ਇਸ ਮਾਮਲੇ ਵਿਚ ਘਸੀਟਣ 'ਤੇ ਵੀ ਰੋਕ ਲਾ ਦਿੱਤੀ। ਅਦਾਲਤ ਦੇ ਬਾਹਰ ਗੱਲ ਕਰਦਿਆਂ ਵਿਕਟਰ ਟਰਨਰ ਨੇ ਕਿਹਾ ਕਿ ਉਹ ਬਿਲਕੁੱਲ ਨਿਰਦੋਸ਼ ਹਨ ਤੇ ਸ਼ੁਕਰ ਹੈ ਕਿ ਆਖਰਕਾਰ ਉਨਾਂ ਨੂੰ ਨਿਆਂ ਮਿਲਿਆ ਹੈ। ਉਨਾਂ ਕਿਹਾ ਕਿ ਉਹ ਅਜੇ ਵੀ ਬੱਚੇ ਨੂੰ ਯਾਦ ਕਰਕੇ ਉਦਾਸ ਹੋ ਜਾਂਦੇ ਹਨ। ਉਨਾਂ ਕਿਹਾ ਕਿ ਹੁਣ ਮੈ ਸਿਰ ਉਪਰ ਕਰਕੇ ਤੁਰ ਸਕਦਾ ਹਾਂ।