ਅਮਰੀਕੀ ਰੈਸਟੂਰੈਂਟ ਉਦਯੋਗ ਵਿੱਚ ਨਾਮਣਾ ਖੱਟ ਰਹੇ ਪੰਜਾਬੀ ਸੁਰਜੀਤ ਸਿੰਘ ਮੱਟੂ ਦੇ ਅਮਰ ਇੰਡੀਆ ਰੈਸਟੂਰੈਂਟ ਨੇ ਜਿੱਤਿਆ ਸਰਵੋਤਮ ਪੁਰਸਕਾਰ

ਅਮਰੀਕੀ ਰੈਸਟੂਰੈਂਟ ਉਦਯੋਗ ਵਿੱਚ ਨਾਮਣਾ ਖੱਟ ਰਹੇ ਪੰਜਾਬੀ ਸੁਰਜੀਤ ਸਿੰਘ ਮੱਟੂ ਦੇ ਅਮਰ ਇੰਡੀਆ ਰੈਸਟੂਰੈਂਟ ਨੇ ਜਿੱਤਿਆ ਸਰਵੋਤਮ ਪੁਰਸਕਾਰ

ਅੰਮ੍ਰਿਤਸਰ ਟਾਈਮਜ਼ ਬਿਊਰੋ

ਓਹਾਇਓ  :ਡਾ. ਚਰਨਜੀਤ ਸਿੰਘ ਗੁਮਟਾਲਾ ਜਨਵਰੀ 23, 2022: ਵਿਦੇਸ਼ਾਂ ਵਿੱਚ ਵੱਖ ਵੱਖ ਖੇਤਰਾਂ ਵਿੱਚ ਆਪਣੀ ਹਿੰਮਤ ਅਤੇ ਮਿਹਨਤ ਸਦਕਾ ਅਨੇਕਾਂ ਪੰਜਾਬੀ ਨਾਮਣਾ ਖੱਟ ਰਹੇ ਹਨ। ਅਜਿਹੀਆਂ ਹੀ ਸ਼ਖ਼ਸ਼ੀਅਤਾਂ ਵਿੱਚੋਂ ਇੱਕ ਨਾਮਵਰ ਸ਼ਖ਼ਸੀਅਤ ਸੁਰਜੀਤ ਸਿੰਘ ਮੱਟੂ ਅਮਰੀਕਾ ਦੇ ਓਹਾਇਓ ਸੂਬੇ ਦੇ ਸ਼ਹਿਰ ਡੇਟਨ, ਜੋ ਕਿ ਹਵਾਈ ਜਹਾਜ਼ਾਂ ਦੇ ਜਨਮਦਾਤਾ ਸ਼ਹਿਰ ਦੇ ਨਾਂ ਨਾਲ ਜਾਣਿਆ ਜਾਂਦਾ ਹੈ ਵਿਚ ਹਨ। ਇੱਥੇ ਉਨ੍ਹਾਂ ਦਾ ਅਮਰ ਇੰਡੀਆ ਰੈਸਟੂਰੈਂਟ ਹੈ ਜੋ ਕਿ ਪਿਛਲੇ ਕਈ ਸਾਲਾਂ ਤੋਂ ਬਹੁਤ ਸਾਰੇ ਪੁਰਸਕਾਰ ਵੀ ਜਿੱਤ ਰਿਹਾ ਹੈ।

ਬੀਤੇ ਦਿਨੀਂ ਸਾਲ 2022 ਲਈ ਓਹਾਇਓ ਰੈਸਟੂਰੈਂਟ ਐਸੋਸੀਏਸ਼ਨ ਵਲੋਂ ਅਮਰ ਇੰਡੀਆ ਰੈਸਟੂਰੈਂਟ ਨੂੰ ਪੂਰੇ ਓਹਾਇਓ ਸੂਬੇ ਵਿਚੋਂ ਬੈਸਟ ਰੈਸਟੂਰੈਂਟ ਪੁਰਸਕਾਰ ਨਾਲ ਨਿਵਾਜਿਆ ਗਿਆ। ਇਹ ਰੈਸਟੂਰੈਂਟ ਉਨ੍ਹਾਂ ਨੇ ਆਪਣੇ ਪਿਤਾ ਦੇ ਨਾਂ ‘ਤੇ 1991 ਵਿੱਚ ਖੋਲਿਆ ਸੀ। ਇਹੀ ਨਹੀਂ ਪਿਛਲੇ ਸਾਲ 2022 ਵਿੱਚ ਡੋਰਡੈਸ਼ ਕੰਪਨੀ ਵਲੋਂ ਅਮਰੀਕਾ ਦੇ ਚੋਟੀ ਦੇ 100 ਰੈਸਟੂਰੈਂਟਾਂ ਦੀ ਸੂਚੀ ਵਿਚ  ਓਹਾਇਓ ਸੂਬੇ ਦਾ ਇਹ ਇਕਲੌਤਾ ਸਭ ਤੋਂ ਹਰਮਨ ਪਿਆਰਾ ਰੈਸਟੂਰੈਂਟ ਸੀ। ਸਾਲ 2022 ਦੀਆਂ ਹੋਰ ਉਪਲੱਬਧੀਆਂ ਵਿੱਚ ਉਹਨਾਂ ਨੂੰ ਸਾਉਥ ਮੈਟਰੋ ਚੈਂਬਰ ਆਫ ਕਾਮਰਸ ਡੇਟਨ ਵਲੋਂ “ਬੈਸਟ ਬਿਜ਼ਨਜ਼ ਸਾਉਥ ਡੇਟਨ” ਅਤੇ ਡੇਟਨ ਬਿਜ਼ਨਜ਼ ਜਰਨਲ ਵਲੋਂ “ਬੈਸਟ 50 ਕੰਪਨੀਜ਼ ਇਨ ਰੀਜਨ”ਪੁਰਸਕਾਰ ਵੀ ਮਿਲਿਆ।

ਉਹਨਾਂ ਅਨੁਸਾਰ ਇਸ ਕਾਮਯਾਬੀ ਵਿੱਚ ਮੇਰੀ ਪਤਨੀ ਜਤਿੰਦਰ ਕੌਰ ਮੱਟ ਸਪੁੱਤਰੀ ਕੈਪਟਨ ਗੁਰਦਿਆਲ ਸਿੰਘ ਤੋਂ ਇਲਾਵਾ ਛੋਟੇ ਭਰਾ ਲਖਵਿੰਦਰ ਸਿੰਘ ਮੱਟੂ, ਭਾਣਜਾ ਮਨਦੀਪ ਸਿੰਘ ਪੱਡਾ, ਭੈਣ ਸਵਰਣ ਕੌਰ ਸੰਧੂ ਅਤੇ ਹੋਰਨਾਂ ਪਰਿਵਾਰਕ ਮੈਂਬਰਾਂ ਨੇ ਵੀ ਵੱਡਮੁੱਲਾ ਯੋਗਦਾਨ ਪਾਇਆ ਹੈ।

ਸਾਲ 2022 ਵਿੱਚ ਮਿਲੇ ਪੁਰਸਕਾਰਾਂ ਤੋਂ ਇਲਾਵਾਂ ਉਹਨਾਂ ਨੇ ਮਿਹਨਤ ਸਦਕਾ 2017, 2018, 2019, 2020, 2021, 2022 ਤੋਂ ਹਰ ਸਾਲ ਲਗਾਤਾਰ ਡੇਟਨ ਡੇਲੀ ਨਿਉਜ਼ ਅਖਬਾਰ ਵਲੋਂ “ਬੈਸਟ ਆਫ਼ ਡੇਟਨ” ਅਵਾਰਡ ਵੀ ਪ੍ਰਾਪਤ ਕੀਤਾ ਹੈ। 2021 ਵਿੱਚ ਮਿਆਮੀ ਟਾਊਨਸ਼ਿਪ ਪੁਲਿਸ ਵਿਭਾਗ ਵਲੋਂ ੳੇਹਨਾਂ ਨੂੰ “ਚੀਫ਼ਸ ਅਵਾਰਡ ਆਫ਼ ਐਕਸੀਲੈਂਸੀ ਫਾਰ ਕਮਿਉਨਿਟੀ ਸਰਵਿਸ” ਵੀ ਦਿੱਤਾ ਗਿਆ।

ਉਹਨਾਂ ਦੀਆਂ ਹੋਰਨਾਂ ਪ੍ਰਾਪਤੀਆਂ ਵਿੱਚ ਟ੍ਰਿਪ ਐਡਵਾਈਜ਼ਰ ਕੰਪਨੀ ਵਲੋਂ ਸਾਲ 2008 ਵਿੱਚ 357 ਰੈਸਟੂਰੈਂਟ ਵਿੱਚੋਂ ਨੰਬਰ ਇੱਕ ਰੈਸਟੂਰੈਂਟ, ਸਾਲ 2012 ਅਤੇ 2016 ਵਿੱਚ ਸਰਟੀਫੀਕੇਟ ਆਫ ਐਕਸੀਲੈਂਸ ਪੁਰਸਕਾਰ ਵੀ ਦਿੱਤਾ ਗਿਆ। ਇਸ ਦੇ ਨਾਲ 2005, 2006, 2007, 2008 ਵਿੱਚ ਏਏਏ ਦੁਆਰਾ ਡਾਇਮੰਡ ਰੇØਿਟੰਗ ਦਿੱਤੀ ਗਈ। ਦੁਨੀਆਂ ਦੀ ਮਸ਼ਹੂਰ ਕੰਪਨੀ ਜਨਰਲ ਇਲੈਕਟ੍ਰਿਕ (ਜੀ.ਈ) ਵਲੋਂ ਸਰਟੀਫਿਕੇਟ ਆਫ਼ ਐਕਸੀਲੈਂਸ ਵੀ ਪ੍ਰਦਾਨ ਕੀਤਾ ਗਿਆ ਹੈ। ਇੰਡੀਆ ਕਲੱਬ ਆਫ਼ ਗ੍ਰੇਟਰ ਡੇਟਨ ਅਤੇ ਇੰਡੀਆ ਕਲੱਬ ਆਫ਼ ਸਿਨਸਿਨਾਟੀ ਵਲੋਂ ਵੀ ਅਨੇਕਾਂ ਵਾਰ ਅਤੇ ਟ੍ਰਾਈ ਸਟੇਟ ਦੁਰਗਾ ਪੂਜਾ ਸੁਸਾਇਟੀ ਵਲੋਂ ਬੈਸਟ ਕੈਟਰ ਪੁਰਸਕਾਰ ਮਿਲ ਚੁੱਕਾ ਹੈ।

ਉਹ ਸਮਾਜ ਸੇਵੀ ਕੰਮਾਂ ਵਿੱਚ ਵੀ ਵੱਧ ਚੜ੍ਹ ਕੇ ਭਾਗ ਲੈਂਦੇ ਹਨ। ਜਿੱਥੋਂ ਤੀਕ ਸੁਰਜੀਤ ਸਿੰਘ ਦੇ ਪਿਛੋਕੜ ਦਾ ਸੰਬੰਧ ਹੈ ਉਹ ਪਿੰਡ ਬੱਗਾ ਤਹਿਸੀਲ ਨਕੋਦਰ ਜ਼ਿਲ੍ਹਾ ਜਲੰਧਰ ਦਾ ਜੰਮਪਲ ਹੈ। ਉਹਨਾਂ ਨੇ ਮੁੱਢਲੀ ਸਿੱਖਿਆ ਪਿੰਡ ਬੱਗਾ, ਹਾਇਅਰ ਸੈਕੰਡਰੀ ਮੰਗਲ ਅੰਬੀਆਂ ਅਤੇ ਬੀ.ਏ. ਦੀ ਡਿਗਰੀ 1975 ਵਿੱਚ ਗੁਰੂ ਨਾਨਕ ਨੈਸ਼ਨਲ ਕਾਲਜ ਨਕੋਦਰ ਤੋਂ ਪ੍ਰਾਪਤ ਕੀਤੀ। ਉਹ 1981 ਵਿੱਚ ਅਮਰੀਕਾ ਦੇ ਸ਼ਹਿਰ ਬੋਸਟਨ ਆਏ ਜਿਥੇ ਉਹਨਾਂ ਨੇ ਇਲੈਕਟ੍ਰੀਸ਼ਨ ਦੇ ਨਾਲ ਰੈਸਟੂਰੈਂਟ ਵਿੱਚ ਪਾਰਟ-ਟਾਈਮ ਕੰਮ ਕਰਨਾ ਸ਼ੁਰੂ ਕੀਤਾ। 1982 ਵਿੱਚ ਉਹ ਹੁਸਟਨ ਟੈਕਸਾਸ ਤੇ ਫਿਰ 1984 ਵਿੱਚ ਡੇਟਨ ਆਏ। ਇੱਥੇ ਉਹਨਾਂ ਨੂੰ ਟੇਸਟ ਆਫ਼ ਇੰਡੀਆ ਰੈਸਟੂਰੈਂਟ ਦੀ ਨਿਗਰਾਨੀ ਦਾ ਕੰਮ ਸੌਂਪਿਆ ਗਿਆ। 1989 ਵਿੱਚ ਅਮਰੀਕਨ ਰੈਸਟੂਰੈਂਟ ਹੈਲਨ ਆਫ਼ ਟ੍ਰਾਇ ਵਿੱਚ ਬਤੌਰ ਜਨਰਲ ਮੈਨੇਜ਼ਰ ਕੰਮ ਕਰਨ ਉਪਰੰਤ ਉਹਨਾਂ 1991 ਵਿੱਚ ਅਮਰ ਇੰਡੀਆ ਰੈਸਟੂਰੈਂਟ ਖੋਲਿਆ।