ਕੈਨੇਡਾ, ਚੀਨ ਅਤੇ ਮੈਕਸੀਕੋ ਤੋਂ ਬਾਅਦ ਭਾਰਤ ਦਾ ਨੰਬਰ?

 ਡੋਨਾਲਡ ਟਰੰਪ ਦੀ 'ਟ੍ਰੇਡ ਵਾਰ' ਇੰਡੀਆ 'ਤੇ ਕੀ ਅਸਰ ਪਾਵੇਗੀ?

ਅਗਲੇ ਸਾਲ ਜਨਵਰੀ ਵਿਚ ਰਾਸ਼ਟਰਪਤੀ ਅਹੁਦੇ ਦੀ ਸਹੁੰ ਚੁੱਕਣ ਤੋਂ ਪਹਿਲਾਂ ਡੋਨਾਲਡ ਟਰੰਪ ਨੇ ਸੋਸ਼ਲ ਮੀਡੀਆ ਪੋਸਟ ਰਾਹੀਂ ਕੈਨੇਡਾ, ਮੈਕਸੀਕੋ ਅਤੇ ਚੀਨ 'ਤੇ ਭਾਰੀ ਟੈਰਿਫ ਲਗਾਉਣ ਦੀ ਗੱਲ ਕੀਤੀ ਹੈ, ਜਿਸ ਨੇ ਤਿੰਨੋਂ ਦੇਸ਼ਾਂ ਨੂੰ ਪਰੇਸ਼ਾਨ ਕਰ ਦਿੱਤਾ ਹੈ।

ਰਾਇਟਰਜ਼ ਦੇ ਇੱਕ ਸਰਵੇਖਣ ਅਨੁਸਾਰ ਨਵੀਂ ਅਮਰੀਕੀ ਸਰਕਾਰ ਅਗਲੇ ਸਾਲ ਚੀਨ ਤੋਂ ਸਮਾਨ ਦੀ ਦਰਾਮਦ 'ਤੇ ਲਗਭਗ 40% ਟੈਰਿਫ ਲਗਾ ਸਕਦੀ ਹੈ। ਹਾਲਾਂਕਿ ਚੀਨ ਨੇ ਟਰੰਪ ਦੇ ਟੈਰਿਫ ਯੁੱਧ ਨਾਲ ਨਜਿੱਠਣ ਲਈ ਆਪਣੀਆਂ ਕੰਪਨੀਆਂ ਨੂੰ ਭਾਰੀ ਫੰਡ ਮੁਹੱਈਆ ਕਰਵਾਉਣ ਦਾ ਫੈਸਲਾ ਕੀਤਾ ਹੈ, ਕੈਨੇਡਾ ਅਤੇ ਮੈਕਸੀਕੋ, ਜਿਨ੍ਹਾਂ ਦੀ ਆਰਥਿਕ ਹਾਲਤ ਚੰਗੀ ਨਹੀਂ ਹੈ, ਨੂੰ ਕਾਫੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਵੇਗਾ।

ਟਰੰਪ ਨੇ ਸੋਸ਼ਲ ਮੀਡੀਆ 'ਤੇ ਘੋਸ਼ਣਾ ਕੀਤੀ ਹੈ ਕਿ ਉਹ ਮੈਕਸੀਕੋ ਅਤੇ ਕੈਨੇਡਾ ਤੋਂ ਸਾਰੇ ਆਯਾਤ 'ਤੇ 25% ਟੈਰਿਫ ਲਗਾਏਗਾ। ਇਸ ਤੋਂ ਇਲਾਵਾ, ਚੀਨੀ ਵਸਤਾਂ ਨੂੰ ਵਾਧੂ 10% ਟੈਰਿਫ ਦਾ ਸਾਹਮਣਾ ਕਰਨਾ ਪਏਗਾ ਜਦੋਂ ਤੱਕ ਬੀਜਿੰਗ ਅਮਰੀਕਾ ਵਿੱਚ ਸਿੰਥੈਟਿਕ ਓਪੀਔਡ ਫੈਂਟਾਨਿਲ ਦੀ ਤਸਕਰੀ ਨੂੰ ਰੋਕਣ ਲਈ ਠੋਸ ਕਦਮ ਨਹੀਂ ਚੁੱਕਦਾ।

ਮੈਕਸੀਕੋ, ਚੀਨ ਅਤੇ ਕੈਨੇਡਾ 'ਤੇ ਅਮਰੀਕਾ ਦੇ ਟੈਰਿਫ ਕੀ ਹਨ?

ਰਾਇਟਰਜ਼ ਪੋਲ ਦੇ ਅਨੁਸਾਰ, ਡੋਨਾਲਡ ਟਰੰਪ ਚੀਨੀ ਸਮਾਨ 'ਤੇ 60% ਟੈਰਿਫ ਲਗਾਉਣ ਤੋਂ ਬਚਣਗੇ। ਜਨਵਰੀ ਵਿੱਚ ਅਹੁਦਾ ਸੰਭਾਲਣ ਵਾਲੇ ਟਰੰਪ ਨੇ ਆਪਣੀ ਚੋਣ ਮੁਹਿੰਮ ਦੌਰਾਨ 'ਅਮਰੀਕਾ ਫਸਟ' ਵਪਾਰਕ ਉਪਾਵਾਂ ਦੇ ਇੱਕ ਪੈਕੇਜ ਦੇ ਹਿੱਸੇ ਵਜੋਂ ਚੀਨੀ ਦਰਾਮਦਾਂ 'ਤੇ ਭਾਰੀ ਟੈਰਿਫ ਲਗਾਉਣ ਦਾ ਵਾਅਦਾ ਕੀਤਾ ਸੀ, ਜਿਸ ਨਾਲ ਬੀਜਿੰਗ ਵਿੱਚ ਬੇਚੈਨੀ ਪੈਦਾ ਹੋ ਗਈ ਹੈ ਅਤੇ ਚੀਨ ਲਈ ਵਿਕਾਸ ਦੇ ਜੋਖਮ ਵਧ ਗਏ ਹਨ।ਟੈਰਿਫ ਦਰਾਂ ਟਰੰਪ ਦੇ ਪਹਿਲੇ ਕਾਰਜਕਾਲ ਦੌਰਾਨ ਚੀਨ 'ਤੇ ਲਗਾਏ ਗਏ 7.5% -25% ਤੋਂ ਬਹੁਤ ਜ਼ਿਆਦਾ ਹਨ, ਜਦੋਂ ਕਿ ਲੰਬੇ ਸਮੇਂ ਤੋਂ ਸੰਪੱਤੀ ਦੀ ਮੰਦੀ, ਕ੍ਰੈਡਿਟ ਜੋਖਮ ਅਤੇ ਕਮਜ਼ੋਰ ਘਰੇਲੂ ਮੰਗ ਦੇ ਕਾਰਨ ਆਰਥਿਕਤਾ ਵੀ ਬਹੁਤ ਜ਼ਿਆਦਾ ਕਮਜ਼ੋਰ ਸਥਿਤੀ ਵਿੱਚ ਹੈ।

  13-20 ਨਵੰਬਰ ਦੇ ਰਾਇਟਰਜ਼ ਪੋਲ ਤੋਂ ਪਤਾ ਚਲਿਆ ਕਿ  ਚੀਨ  ਨੂੰ ਉਮੀਦ ਹੈ ਕਿ ਟਰੰਪ ਅਗਲੇ ਸਾਲ ਦੇ ਸ਼ੁਰੂ ਵਿੱਚ ਟੈਰਿਫ ਲਗਾਉਣਗੇ ,ਜਿਸ ਦਾ ਔਸਤ ਅਨੁਮਾਨ 38% ਹੈ। 

ਨਵੇਂ ਯੂਐਸ ਟੈਰਿਫ ਚੀਨ ਦੀ 2025 ਦੇ ਆਰਥਿਕ ਵਿਕਾਸ ਨੂੰ ਲਗਭਗ 0.5% -1.0% ਪ੍ਰਤੀਸ਼ਤ ਅੰਕਾਂ ਤਕ ਪ੍ਰਭਾਵਿਤ ਕਰ ਸਕਦਾ ਹੈ। ਹਾਲਾਂਕਿ, ਰਾਇਟਰਜ਼  ਪੋਲ  ਵਿਚ ਸ਼ਾਮਿਲ  ਜ਼ਿਆਦਾਤਰ ਅਰਥਸ਼ਾਸਤਰੀਆਂ ਨੇ ਇਸ ਸਾਲ ਅਤੇ 2025 ਲਈ ਆਪਣੇ ਔਸਤ ਵਿਕਾਸ ਪੂਰਵ ਅਨੁਮਾਨਾਂ ਨੂੰ ਕ੍ਰਮਵਾਰ 4.8% ਅਤੇ 4.5% ਲਈ ਬਣਾਈ ਰੱਖਿਆ, ਜੋ ਲਗਭਗ ਯੂਐਸ ਚੋਣਾਂ ਤੋਂ ਪਹਿਲਾਂ ਕੀਤੇ ਗਏ ਅਨੁਮਾਨਾਂ ਦੇ ਸਮਾਨ ਹੈ। ਚੀਨ ਦੀ ਵਿਕਾਸ ਦਰ 2026 ਵਿੱਚ ਹੋਰ ਘੱਟ ਕੇ 4.2% ਰਹਿਣ ਦੀ ਉਮੀਦ ਹੈ।

ਇਕਨਾਮਿਸਟ ਇੰਟੈਲੀਜੈਂਸ ਯੂਨਿਟ (ਈਆਈਯੂ) ਦੇ ਅਨੁਸਾਰ, ਅਮਰੀਕਾ ਦੇ ਤਿੰਨ ਸਭ ਤੋਂ ਵੱਡੇ ਵਪਾਰਕ ਭਾਈਵਾਲ ਮੈਕਸੀਕੋ, ਚੀਨ ਅਤੇ ਕੈਨੇਡਾ, ਟਰੰਪ ਦੀਆਂ ਪ੍ਰਸਤਾਵਿਤ ਨੀਤੀਆਂ ਕਾਰਣ ਸਭ ਤੋਂ ਵੱਧ ਅਸੁਰੱਖਿਅਤ ਹਨ। ਇਕਨਾਮਿਸਟ ਇੰਟੈਲੀਜੈਂਸ ਯੂਨਿਟ ਨੇ ਭਾਰਤ ਨੂੰ ਉਨ੍ਹਾਂ ਦੇਸ਼ਾਂ ਦੀ ਸੂਚੀ ਵਿੱਚ ਅੱਠਵੇਂ ਸਥਾਨ 'ਤੇ ਰੱਖਿਆ ਹੈ ਜੋ ਟਰੰਪ ਦੇ ਰਾਸ਼ਟਰਪਤੀ ਦੇ ਕਾਰਜਕਾਲ ਦੌਰਾਨ ਵਪਾਰਕ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।

ਚੀਨ ਅਤੇ ਹੋਰ ਦੇਸ਼ਾਂ ਦੀ ਆਰਥਿਕਤਾ 'ਤੇ ਪ੍ਰਭਾਵ

ਅਮਰੀਕੀ ਟੈਰਿਫ ਦਾ ਤੁਰੰਤ ਪ੍ਰਭਾਵ ਇਹ ਹੋਵੇਗਾ ਕਿ ਕੈਨੇਡਾ, ਮੈਕਸੀਕੋ ਅਤੇ ਚੀਨ ਦੀਆਂ ਕੰਪਨੀਆਂ ਲਈ ਅਮਰੀਕਾ ਨੂੰ ਮਾਲ ਨਿਰਯਾਤ ਕਰਨਾ ਹੋਰ ਮਹਿੰਗਾ ਹੋ ਜਾਵੇਗਾ, ਜਿਸ ਨਾਲ ਉਨ੍ਹਾਂ ਦੀ ਆਮਦਨ ਘਟੇਗੀ। ਅਤੇ ਡਰ ਇਹ ਹੈ ਕਿ ਇਹ ਕੰਪਨੀਆਂ ਆਪਣੇ ਉਤਪਾਦਾਂ ਦੀਆਂ ਕੀਮਤਾਂ ਵਧਾ ਸਕਦੀਆਂ ਹਨ, ਜਿਸ ਦਾ ਅਸਰ ਆਮ ਗਾਹਕਾਂ 'ਤੇ ਪਵੇਗਾ, ਕਿਉਂਕਿ ਕੀਮਤਾਂ ਵਧ ਸਕਦੀਆਂ ਹਨ।

ਮੈਕਸੀਕੋ ਦੇ ਆਟੋ ਉਦਯੋਗ ਨੂੰ ਟੈਰਿਫ ਕਾਰਨ ਨੁਕਸਾਨ ਹੋ ਸਕਦਾ ਹੈ। ਕੇਂਦਰੀ ਅਮਰੀਕੀ ਦੇਸ਼ ਹੌਂਡਾ, ਨਿਸਾਨ, ਟੋਇਟਾ, ਮਜ਼ਦਾ ਅਤੇ ਕੀਆ ਲਈ ਨਿਰਮਾਣ ਯੂਨਿਟਾਂ ਦੇ ਨਾਲ-ਨਾਲ ਕਈ ਚੀਨੀ ਆਟੋ ਪਾਰਟਸ ਸਪਲਾਇਰਾਂ ਦਾ ਘਰ ਹੈ।

ਇਸ ਦੇ ਨਾਲ ਹੀ, ਫੌਕਸਕਾਨ, ਐਨਵੀਡੀਆ, ਲੇਨੋਵੋ ਅਤੇ ਐਲਜੀ ਵਰਗੀਆਂ ਏਸ਼ੀਆਈ ਤਕਨੀਕੀ ਕੰਪਨੀਆਂ, ਜਿਨ੍ਹਾਂ ਨੇ ਮੈਕਸੀਕੋ ਵਿੱਚ ਫੈਕਟਰੀਆਂ ਅਤੇ ਹੋਰ ਸੇਵਾਵਾਂ ਦਾ ਵਿਸਥਾਰ ਕੀਤਾ ਹੈ, ਵੀ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਣਗੇ। ਕੈਨੇਡੀਅਨ ਮੀਡੀਆ ਨੇ ਕੈਨੇਡੀਅਨ ਚੈਂਬਰ ਆਫ ਕਾਮਰਸ ਦੇ ਪਿਛਲੇ ਅਨੁਮਾਨਾਂ ਦਾ ਹਵਾਲਾ ਦਿੰਦੇ ਹੋਏ ਰਿਪੋਰਟ ਦਿੱਤੀ ਹੈ ਕਿ 10% ਟੈਰਿਫ ਵੀ ਹਰ ਸਾਲ ਕੈਨੇਡਾ ਨੂੰ $21 ਬਿਲੀਅਨ ਦਾ ਆਰਥਿਕ ਨੁਕਸਾਨ ਕਰ ਸਕਦਾ ਹੈ। ਕੈਨੇਡਾ ਮੁੱਖ ਤੌਰ 'ਤੇ ਅਮਰੀਕਾ ਨੂੰ ਪੈਟਰੋਲੀਅਮ, ਗੈਸ ਅਤੇ ਵਾਹਨ ਨਿਰਯਾਤ ਕਰਦਾ ਹੈ।

ਹਾਂਗਕਾਂਗ ਵਿੱਚ ਨੈਟਿਕਸਿਸ ਵਿੱਚ ਏਸ਼ੀਆ ਪੈਸੀਫਿਕ ਖੇਤਰ  ਦੇ ਸੀਨੀਅਰ ਅਰਥ ਸ਼ਾਸਤਰੀ ਗੈਰੀ ਐਨਜੀ,ਅਲ ਜਜ਼ੀਰਾ ਤੋਂ ਅਮਰੀਕੀ ਕੇਂਦਰੀ ਬੈਂਕ ਦਾ ਹਵਾਲਾ ਦਿੰਦੇ ਹੋਏ  ਦੱਸਿਆ ਕਿ ਟੈਰਿਫ ਕਾਰਣ ਅਮਰੀਕਾ ਵਿੱਚ ਮਹਿੰਗਾਈ ਵਧ ਸਕਦੀ ਹੈ। ਵਾਸ਼ਿੰਗਟਨ ਵਿੱਚ ਚੀਨ ਦੇ ਦੂਤਾਵਾਸ ਨੇ ਕਿਹਾ ਕਿ ਵਪਾਰ ਯੁੱਧ ਦਾ ਕਿਸੇ ਵੀ ਪੱਖ ਨੂੰ ਫਾਇਦਾ ਨਹੀਂ ਹੋਵੇਗਾ। ਬੁਲਾਰੇ ਲਿਊ ਪੇਂਗਯੂ ਨੇ ਇੱਕ ਬਿਆਨ ਵਿੱਚ ਚੀਨ 'ਤੇ ਅਮਰੀਕੀ ਟੈਰਿਫ ਦੇ ਮੁੱਦੇ 'ਤੇ ਕਿਹਾ ਕਿ ਚੀਨ ਦਾ ਮੰਨਣਾ ਹੈ ਕਿ ਚੀਨ-ਅਮਰੀਕਾ ਆਰਥਿਕ ਅਤੇ ਵਪਾਰਕ ਸਹਿਯੋਗ ਕੁਦਰਤੀ ਤੌਰ ਉਪਰ ਆਪਸ ਵਿਚ ਲਾਭਦਾਇਕ ਹੈ," 

ਭਾਰਤ 'ਤੇ ਕੀ ਹੋਵੇਗਾ ਅਸਰ?

ਹੁਣ ਤੱਕ ਡੋਨਾਲਡ ਟਰੰਪ ਨੇ ਭਾਰਤੀ ਸਮਾਨ 'ਤੇ ਟੈਰਿਫ ਲਗਾਉਣ ਦੀ ਗੱਲ ਨਹੀਂ ਕੀਤੀ ਹੈ ਪਰ ਮਾਹਿਰਾਂ ਦਾ ਮੰਨਣਾ ਹੈ ਕਿ  ਅਗਲਾ ਨੰਬਰ ਭਾਰਤ ਦਾ ਹੋ ਸਕਦਾ ਹੈ। ਟਰੰਪ ਨੇ ਚੋਣ ਪ੍ਰਚਾਰ ਦੌਰਾਨ ਭਾਰਤ ਨੂੰ 'ਵੱਡਾ ਵਪਾਰਕ ਦੁਰਵਿਹਾਰ ਕਰਨ ਵਾਲਾ' ਕਿਹਾ ਸੀ। ਅਮਰੀਕਾ ਭਾਰਤ ਦਾ ਸਭ ਤੋਂ ਵੱਡਾ ਵਪਾਰਕ ਭਾਈਵਾਲ ਹੈ ਅਤੇ ਜੇਕਰ ਭਾਰਤ 'ਤੇ ਵੀ ਟੈਰਿਫ ਲਗਾਇਆ ਜਾਂਦਾ ਹੈ ਤਾਂ ਇਸ ਨਾਲ ਭਾਰਤੀ ਬਰਾਮਦਾਂ 'ਤੇ ਗੰਭੀਰ ਅਸਰ ਪਵੇਗਾ।

ਹਾਲਾਂਕਿ ਚੀਨੀ ਵਸਤਾਂ 'ਤੇ ਟੈਰਿਫ ਲਗਾਉਣ ਨਾਲ ਚੀਨੀ ਬਰਾਮਦਾਂ 'ਤੇ ਗੰਭੀਰ ਪ੍ਰਭਾਵ ਪਵੇਗਾ, ਪਰ ਬਰਨਸਟਾਈਨ ਦੁਆਰਾ ਕੀਤੀ ਗਈ ਖੋਜ ਦਰਸਾਉਂਦੀ ਹੈ ਕਿ ਚੀਨੀ ਵਸਤੂਆਂ 'ਤੇ ਟੈਰਿਫ ਭਾਰਤ ਲਈ ਸਿਰਫ ਸੀਮਤ ਲਾਭ ਹੋ ਸਕਦਾ ਹੈ। ਇਸ ਦੀ ਬਜਾਏ, ਭਾਰਤ ਨੂੰ ਨਵੇਂ ਟੈਰਿਫ ਦਬਾਅ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ, ਕਿਉਂਕਿ ਟਰੰਪ ਨੇ ਆਪਣੇ ਪਹਿਲੇ ਕਾਰਜਕਾਲ ਦੇ ਵਪਾਰਕ ਵਿਵਾਦਾਂ 'ਤੇ ਮੁੜ ਵਿਚਾਰ ਕਰਨ ਦਾ ਸੰਕੇਤ ਦਿੱਤਾ ਹੈ।

ਭਾਰਤ ਅਮਰੀਕਾ ਨੂੰ 75 ਬਿਲੀਅਨ ਡਾਲਰ ਦਾ ਸਮਾਨ ਨਿਰਯਾਤ ਕਰਦਾ ਹੈ।

ਗਲੋਬਲ ਟਰੇਡ ਰਿਸਰਚ ਇਨੀਸ਼ੀਏਟਿਵ (ਜੀਟੀਆਰਆਈ) ਦੇ ਅਨੁਸਾਰ, ਜੇਕਰ ਟਰੰਪ ਪ੍ਰਸ਼ਾਸਨ ਚੀਨ 'ਤੇ ਟੈਰਿਫ ਲਗਾਉਂਦਾ ਹੈ, ਤਾਂ ਚੀਨ ਭਾਰਤ ਨੂੰ ਈਵੀ, ਬੈਟਰੀਆਂ ਅਤੇ ਤਕਨੀਕੀ ਸਮਾਨ ਵਰਗੀਆਂ ਆਪਣੀਆਂ ਚੀਜ਼ਾਂ ਵੇਚਣ ਲਈ ਮਜਬੂਰ ਹੋਵੇਗਾ। ਉਸ ਨੇ ਕਿਹਾ, ਚੀਨੀ ਫੇਸ ਮਾਸਕ, ਸਰਿੰਜਾਂ ਅਤੇ ਸੂਈਆਂ, ਮੈਡੀਕਲ ਦਸਤਾਨੇ ਅਤੇ ਕੁਦਰਤੀ ਗ੍ਰਾਫਾਈਟ 'ਤੇ ਅਮਰੀਕਾ ਦੇ ਟੈਰਿਫ, ਭਾਰਤ ਲਈ ਇਕ ਮਹੱਤਵਪੂਰਨ ਮੌਕਾ ਪੈਦਾ ਕਰਦੇ ਹਨ।

ਖੋਜ ਰਿਪੋਰਟ ਵਿੱਚ ਕਿਹਾ ਗਿਆ ਹੈ, "ਇਨ੍ਹਾਂ ਮੰਗ-ਵਾਲੇ ਉਤਪਾਦਾਂ ਦੇ ਉਤਪਾਦਨ ਅਤੇ ਨਿਰਯਾਤ ਨੂੰ ਵਧਾ ਕੇ, ਭਾਰਤ ਅਮਰੀਕੀ ਬਾਜ਼ਾਰ ਵਿੱਚ ਆਪਣਾ ਕਾਰੋਬਾਰ ਵਧਾ ਸਕਦਾ ਹੈ।" ਇਸ ਵਿਚ ਕਿਹਾ ਗਿਆ ਹੈ ਕਿ ਭਾਰਤ ਨੂੰ ਈਵੀ ਅਤੇ ਸੈਮੀਕੰਡਕਟਰਾਂ ਵਰਗੇ ਉਤਪਾਦਾਂ 'ਤੇ ਕੋਈ ਨਿਰਯਾਤ ਲਾਭ ਨਹੀਂ ਮਿਲ ਸਕਦਾ, ਕਿਉਂਕਿ ਭਾਰਤ ਇਨ੍ਹਾਂ ਉਤਪਾਦਾਂ ਦਾ ਸ਼ੁੱਧ ਆਯਾਤਕਾਰ ਹੈ।

ਨਵੀਂ ਦਿੱਲੀ ਈਵੀ ਵਿੱਚ ਨਿਵੇਸ਼ ਨੂੰ ਆਕਰਸ਼ਿਤ ਕਰਨ ਲਈ ਆਪਣੀ ਭੂਮਿਕਾ ਨਿਭਾ ਰਹੀ ਹੈ। ਪਿਛਲੇ ਮਹੀਨੇ, ਸਰਕਾਰ ਨੇ ਇੱਕ ਨਵੀਂ ਨੀਤੀ ਬਣਾਈ ਸੀ ,ਜਿਸ ਵਿਚ ਕੁਝ ਮਾਡਲਾਂ 'ਤੇ ਦਰਾਮਦ ਟੈਕਸ ਨੂੰ 100% ਤੋਂ ਘਟਾ ਕੇ 15% ਕਰ ਦਿਤਾ , ਬਸ਼ਰਤੇ ਜੇਕਰ ਕੋਈ ਨਿਰਮਾਤਾ ਭਾਰਤ ਵਿੱਚ ਘੱਟੋ-ਘੱਟ 500 ਮਿਲੀਅਨ ਡਾਲਰ ਦਾ ਨਿਵੇਸ਼ ਕਰਦਾ ਹੈ ਅਤੇ ਇਕ ਫੈਕਟਰੀ ਵੀ ਸਥਾਪਤ ਕਰਦਾ ਹੈ

ਜੀਟੀਆਰਆਈ ਦੇ ਅਜੈ ਸ਼੍ਰੀਵਾਸਤਵ ਨੇ ਕਿਹਾ, "ਅਮਰੀਕਾ ਅਤੇ ਯੂਰਪੀਅਨ ਯੂਨੀਅਨ (ਈਯੂ) ਚੀਨ 'ਤੇ ਨਿਰਭਰਤਾ ਘਟਾਉਣ ਲਈ ਸਰਗਰਮ ਕਦਮ ਚੁੱਕ ਰਹੇ ਹਨ। ਚੀਨ ਤੋਂ ਬਰਾਮਦ ਰੁਕਣ ਅਤੇ ਦਰਾਮਦ ਵਧਣ ਨਾਲ ਭਾਰਤ ਨੂੰ ਵੀ ਚੀਨ ਨੀਤੀ ਦੀ ਲੋੜ ਹੋ ਸਕਦੀ ਹੈ।"

ਵਿੱਤੀ ਸਾਲ 2024 ਵਿੱਚ, ਚੀਨ ਨਾਲ ਭਾਰਤ ਦਾ ਦੁਵੱਲਾ ਵਪਾਰ ਕੁੱਲ 118.4 ਬਿਲੀਅਨ ਡਾਲਰ ਸੀ, ਜਿਸ ਵਿੱਚ ਆਯਾਤ 3.24% ਵਧ ਕੇ 101.7 ਬਿਲੀਅਨ ਡਾਲਰ ਹੋ ਗਿਆ ਸੀ ਅਤੇ ਨਿਰਯਾਤ 8.7% ਵਧ ਕੇ 16.67 ਬਿਲੀਅਨ ਡਾਲਰ ਹੋ ਗਿਆ ਸੀ।

ਇਸ ਦੇ ਉਲਟ, ਭਾਰਤ ਅਤੇ ਅਮਰੀਕਾ ਵਿਚਕਾਰ ਵਪਾਰ ਵਿੱਚ ਮਾਮੂਲੀ ਗਿਰਾਵਟ ਦੇਖੀ ਗਈ। ਵਿੱਤੀ ਸਾਲ 2024 ਵਿੱਚ ਦੋਵਾਂ ਪਾਸਿਆਂ ਦਾ ਵਪਾਰ ਕੁੱਲ 118.3 ਬਿਲੀਅਨ ਡਾਲਰ ਰਿਹਾ, ਜਿਸ ਵਿੱਚ ਭਾਰਤੀ ਨਿਰਯਾਤ 1.32% ਘਟ ਕੇ 77.5 ਬਿਲੀਅਨ ਡਾਲਰ ਅਤੇ ਆਯਾਤ 20% ਘਟ ਕੇ 40.8 ਬਿਲੀਅਨ ਡਾਲਰ ਹੋ ਗਿਆ ਸੀ। ਜਦੋਂ ਟਰੰਪ ਜਨਵਰੀ ਵਿੱਚ ਅਹੁਦਾ ਸੰਭਾਲਣਗੇ ਤਾਂ ਭਾਰਤ ਸਮੇਤ ਅਮਰੀਕਾ ਦੇ ਵਪਾਰਕ ਭਾਈਵਾਲ ਉਸ ਦੀਆਂ ਨੀਤੀਆਂ ਦੇ ਸੰਭਾਵੀ ਨਤੀਜਿਆਂ ਲਈ ਤਿਆਰ ਰਹਿਣ|