ਸਰਹਿੰਦ ਅਤੇ ਚਮਕੌਰ ਸਾਹਿਬ ਦੀਆਂ ਸ਼ਹਾਦਤਾਂ ਤੋਂ ਸੇਧ ਲੈ ਕੇ ਵਰਤਮਾਨ ਸੁਧਾਰੀਏ-ਡਾ. ਉੱਦੋ ਕੇ

ਗੁਰਦੁਆਰਾ ਸਿੰਘ ਸਭਾ ਮਿਲਪੀਟਸ ਵਿਖੇ ਵਿਸ਼ੇਸ਼ ਸੈਮੀਨਾਰ
ਸੈਨਹੋਜ਼ੇ/ਤਰਲੋਚਨ ਸਿੰਘ ਦੁਪਾਲ ਪੁਰ:
ਸ਼ਹੀਦੀ ਸਾਕੇ ਆਪਾ ਕੁਰਬਾਨ ਕਰ ਗਏ ਸੂਰਮਿਆਂ ਦੇ ਖੂਨ ਨਾਲ ਇਤਿਹਾਸ ਵਿਚ ਲਿਖੀਆਂ ਮਹਿਜ਼ ਖੂਨੀ ਇਬਾਰਤਾਂ ਹੀ ਨਹੀਂ ਹੁੰਦੇ ਅਤੇ ਨਾ ਹੀ ਸਾਲ ਦੀ ਸਾਲ ਉਨ੍ਹਾਂ ਨੂੰ ਸਿਰਫ ਚੇਤੇ ਕਰ ਲੈਣਾ ਹੀ ਕਾਫ਼ੀ ਹੁੰਦਾ ਹੈ। ਸ਼ਹੀਦਾਂ ਦੀਆਂ ਯਾਦਗਾਰਾਂ ਮਨਾਉਣ ਦਾ ਮਕਸਦ ਇਹ ਹੋਣਾ ਚਾਹੀਦਾ ਕਿ ਉਨ੍ਹਾਂ ਤੋਂ ਅਣਖ, ਸਿਦਕ ਅਤੇ ਕੁਰਬਾਨੀ ਦੀ ਪ੍ਰੇਰਨਾ ਲੈ ਕੇ ਵਰਤਮਾਨ ਲਈ ਜੂਝਿਆ ਜਾਵੇ। ਇਹ ਭਾਵ ਪੂਰਤ ਸ਼ਬਦ ਸਿੱਖ ਜਗਤ ਦੇ ਨਾਮਵਰ ਬੁਲਾਰੇ ਡਾ. ਸੁਖਪ੍ਰੀਤ ਸਿੰਘ ਉੱਦੋ ਕੇ ਗੁਰਦੁਆਰਾ ਸਿੰਘ ਸਭਾ ਬੇਅ ਏਰੀਆ ਮਿਲਪੀਟਸ ਵਿਖੇ ਇਕ ਵਿਸ਼ੇਸ਼ ਇਕੱਠ ਨੂੰ ਸੰਬੋਧਨ ਕਰਦਿਆਂ ਆਖੇ। ਗੁਰਦੁਆਰਾ ਸਿੰਘ ਸਭਾ ਦੇ ਮੁੱਖ ਸੇਵਾਦਾਰ ਭਾਈ ਜਸਵੰਤ ਸਿੰਘ ਹੋਠੀ ਅਤੇ ਅਮਰੀਕਨ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਗੁਰੂ ਘਰ ਦੇ ਸੈਮੀਨਾਰ ਹਾਲ ਵਿਚ ਚਾਰ ਸਾਹਿਬਜ਼ਾਦਿਆਂ ਦੀਆਂ ਸ਼ਹਾਦਤਾਂ ਬਾਰੇ ਕਰਵਾਏ ਵਿਸ਼ੇਸ਼ ਸੈਮੀਨਾਰ ਵਿਚ ਆਪਣੇ ਖੋਜ ਭਰਪੂਰ ਲੈਕਚਰ ਦੁਆਰਾ ਪੰਜਾਬ ਤੋਂ ਆਏ ਡਾ. ਉੱਧੋ ਕੇ ਨੇ ਪਰਿਵਾਰ ਵਿਛੋੜਾ ਤੋਂ ਲੈ ਕੇ ਸਰਹਿੰਦ ਅਤੇ ਸ੍ਰੀ ਚਮਕੌਰ ਸਾਹਿਬ ਦੇ ਇਤਿਹਾਸ ਦਾ ਬਾਖੂਬੀ ਵਰਨਣ ਕੀਤਾ। ਉਨ੍ਹਾਂ ਪੰਥ ਦੀ ਅਜੋਕੀ ਅਧੋਗਤੀ ਵਾਲੀ ਹਾਲਤ ਬਾਰੇ ਮਿਸਾਲਾਂ ਦਿੰਦਿਆਂ ਆਖਿਆ ਕਿ ਜਿਵੇਂ ਦੁਸ਼ਮਣ ਨੇ ਉਦੋਂ ਗੁਰੂ ਕੇ ਖਾਲਸੇ ਨੂੰ ਕੱਚੀ ਗੜ੍ਹੀ ਵਿਚ ਘੇਰਾ ਪਾਇਆ ਸੀ ਅਤੇ ਦੋ ਸ਼ੀਰ ਖੋਰ ਸਾਹਿਬਜ਼ਾਂਦਿਆਂ ਨੂੰ ਨੀਹਾਂ ਵਿਚ ਚਿਣ ਦਿੱਤਾ ਸੀ, ਉਵੇਂ ਅੱਜ ਵੀ ਗੁਰਾਂ ਦੇ ਨਾਂ ‘ਤੇ ਜਿਉਂਦੇ ਪੰਜਾਬ ਨੂੰ ਸਾਜਿਸ਼ੀ ਮਾਰੂ ਅਲਾਮਤਾਂ ਨੇ ਪੀਡਾ ਘੇਰਾ ਪਾਇਆ ਹੋਇਆ ਹੈ।
ਡਾ.ਉਦੋਕੇ ਨੇ ਕਿਹਾ ਕਿ ਨਸ਼ਿਆਂ ਰੂਪੀ ਜ਼ਹਿਰਾਂ ਦਾ ਪ੍ਰਕੋਪ, ਅੱਖਾਂ ਤੇ ਕੰਨਾਂ ਰਾਹੀਂ ਪ੍ਰੋਸੀ ਜਾ ਰਹੀ ਅਸ਼ਲੀਲਤਾ, ਪੰਥ ਦੇ ਕੇਂਦਰ ਉੱਤੇ ਭਾਰੂ ਪ੍ਰਵਾਰਵਾਦ ਅਤੇ ਅੰਨ੍ਹੇ ਵਾਹ ਪ੍ਰਵਾਸ ਪਲਾਇਨ ਵਰਗੇ ਅਸਹਿ ਦੁੱਖ ਅੱਜ ਪੰਜਾਬ ਵਿਚ ਪੈਰ ਪੈਰ ‘ਤੇ ਪ੍ਰਵਾਰ ਵਿਛੋੜੇ ਪਾ ਰਹੇ ਹਨ। ਆਪਣੇ ਡੇਢ ਘੰਟੇ ਦੇ ਭਾਸ਼ਨ ਵਿਚ ਡਾ. ਉੱਦੋ ਕੇ ਨੇ ਵੱਖ ਵੱਖ ਸਰੋਤਾਂ ਤੋਂ ਮਿਲੇ ਅੰਕੜੇ ਪੇਸ਼ ਕਰਦਿਆਂ ਇਕੱਠ ਨੂੰ ਅਪੀਲ ਕੀਤੀ ਨਵਾਬ ਮਲੇਰ ਕੋਟਲਾ ਵੱਲੋਂ ਮਾਰੇ ਹਾਅ ਦੇ ਨਾਹਰੇ ਨੂੰ ਆਉ ਹੁਣ ਆਪਾਂ ਵੀ ਅਮਲ ਵਿਚ ਲਿਆਈਏ ਤੇ ਯਥਾ ਸ਼ਕਤੀ ਉਪਰਾਲੇ ਕਰਕੇ ਪੁਰਖਿਆਂ ਦੀ ਧਰਤੀ ਲਈ ਜੂਝੀਏ।
ਇਸ ਮੌਕੇ ਗੁਰੂ ਘਰ ਦੀ ਤਰਫੋਂ ਭਾਈ ਜਸਵੰਤ ਸਿੰਘ ਹੋਠੀ ਵੱਲੋਂ ਡਾ. ਉੱਦੋ ਕੇ ਨੂੰ ਸਨਮਾਨਿਤ ਕੀਤਾ ਗਿਆ. ਸਮਾਪਤੀ ਉਪਰੰਤ ਗੁਰੂ ਕਾ ਲੰਗਰ ਅਤੁੱਟ ਵਰਤਿਆ।

ਬਲਵਿੰਦਰਪਾਲ ਸਿੰਘ ਖਾਲਸਾ ਦੀ ਰਿਪੋਰਟ ਅਨੁਸਾਰ  ਸਿੱਖ ਚਿੰਤਕ  ਤੇ ਇਤਿਹਾਸਕਾਰ ਡਾ. ਸੁਖਪ੍ਰੀਤ ਸਿੰਘ ਉਦੋਕੇ ਨੇ ਇਹ ਗੱਲ ਜ਼ੋਰ ਦੇ ਕੇ ਕਹੀ ਕਿ ਸਿੱਖ ਕੌਮ ਦੀ ਹੋਂਦ ਤੇ ਹਸਤੀ ਨੂੰ ਅੱਜ ਵੀ ਓਨਾ ਹੀ ਖਤਰਾ ਹੈ ਜਿਨਾਂ ਤਿੰਨ ਸੌ ਸਾਲ ਪਹਿਲਾਂ ਸੀ। ਤੇ ਇਸ ਲਗਾਤਾਰ ਵਧ ਰਹੇ ਡਰ ਤੇ ਭੈ ਦੇ ਵਾਤਾਵਰਣ ਵਿਚ ਸਾਹਿਬਜ਼ਾਦਿਆਂ ਦੀਆਂ ਸ਼ਹਾਦਤਾਂ ਸਾਡੇ ਲਈ ਚਾਨਣ ਮੁਨਾਰਾ ਹਨ। ਜਿਸ ਦ੍ਰਿੜਤਾ, ਸਿਰੜ ਤੇ ਸਿਦਕ ਨਾਲ ਪੈਗ਼ੰਬਰਾਂ ਦੇ ਸ਼ਹਿਨਸ਼ਾਹ ਦੇ ਲਖਤੇ ਜਿਗਰਾਂ ਨੇ ਮਰਜ਼ੀ ਨਾਲ ਸਿੱਖ ਕੌਮ ਤੇ ਸਮੁੱਚੇ ਸੰਸਾਰ ਦੀ ਅਜ਼ਾਦੀ, ਇਨਸਾਫ ਤੇ ਹੱਕ-ਸੱਚ ਲਈ ਸ਼ਹਾਦਤ ਦਿੱਤੀ, ਇਹ ਸਾਡੇ ਲਈ ਬਹੁਤ ਫਖਰ ਤੇ ਚੜ੍ਹਦੀ ਕਲਾ ਵਾਲੀ ਗੱਲ ਹੈ ਤੇ ਅਸੀਂ ਉਨਾਂ ਦੇ ਮਾਰਗ ਤੇ ਚਲਦਿਆਂ ਆਪਣੀ ਕੌਮ ਦੀ ਹੋਂਦ ਤੇ ਹਸਤੀ ਨੂੰ ਹਰ ਤਰਾਂ ਦੇ ਖਤਰਿਆਂ ਤੋਂ ਬਚਾ ਸਕਦੇ ਹਾਂ। ਸਾਹਿਬਜ਼ਾਦਿਆਂ ਦੀ ਕੁਰਬਾਨੀ ਸਾਨੂੰ ਹਰ ਤਰਾਂ ਦੇ ਭੈਅ ਭਰਪੂਰ ਸਮਿਆਂ ਵਿਚ ਜੱਦੋਜਹਿਦ ਕਰਨ ਲਈ ਪ੍ਰੇਰਨਾ ਦਾ ਸਭ ਤੋਂ ਵੱਡਾ ਇਲਾਹੀ ਸਰੋਤ ਹੈ ਤੇ ਸਾਡੀਆਂ ਆਉਣ ਵਾਲੀਆਂ ਸਿੱਖ ਪੀੜ੍ਹੀਆਂ ਸਾਹਿਬਜ਼ਾਦਿਆਂ ਦੇ ਜੀਵਨ, ਨਿਸ਼ਾਨੇ ਤੇ ਸ਼ਹਾਦਤ ਦੇ ਜਜ਼ਬੇ ਤੋਂ ਸਿਖਿਆ ਲਰਿ ਵਿਚ ਸਦਾ ਗੱਲ ਚਲਦੀ ਰਹਿਣੀ ਚਾਹੀਦੀ ਹੈ ਤਾਂ ਕਿ ਖਾਲਸੇ ਦੀ ਪਰਵਾਜ਼ ਬਾਜ਼ਾਂ ਵਾਲੀ ਹੋਵੇ। ਡਾ: ਉਦੋਕੇ ਨੇ ਸਿੱਖ ਇਤਿਹਾਸ ਦੇ ਅਣਗੌਲੇ ਪੰਨਿਆਂ ਨਾਲ ਸਿੱਖ ਸੰਗਤਾਂ ਨੂੰ ਜਾਣੂੰ ਕਰਵਾਇਆ।