ਆਸਕਰ `ਚ ‘ਹਰਟ ਲਾਕਰ’ ਨੇ ‘ਅਵਤਾਰ’ ਨੂੰ ਪਛਾੜਿਆ
ਅੰਮ੍ਰਿਤਸਰ ਟਾਈਮਜ਼ ਬਿਊਰੋ

ਲਾਸ ਏਂਜਲਸ: ਵਿਸ਼ਵ ਦਾ ਸਭ ਤੋਂ ਵੱਡਾ ਅਤੇ 82ਵਾਂ ਆਸਕਰ ਪੁਰਸਕਾਰ ਸਮਾਰੋਹ ਐਤਵਾਰ ਨੂੰ ਇਥੇ ਕੋਡੈਕ ਥੀਏਟਰ `ਚ ਕਰਵਾਇਆ ਗਿਆ। ਇਸ ਸਮਾਰੋਹ ਕੈਥਰੀਨ ਦੇ ਨਿਰਦੇਸ਼ਨ `ਚ ਬਣੀ ਫਿਲਮ ‘ਦ ਹਰਟ ਲਾਕਰ’ ਦਾ ਜਲਵਾ ਰਿਹਾ। ਹਰਟ ਲਾਕਰ ਨੇ ਅਵਤਾਰ ਨੂੰ ਪਛਾੜ ਕੇ 6 ਪੁਰਸਕਾਰਾਂ `ਤੇ ਕਬਜ਼ਾ ਕੀਤਾ।

‘ਦ ਹਰਟ ਲਾਕਰ’ ਨੂੰ ਸਰਵੋਤਮ ਫਿਲਮ ਦਾ ਆਸਕਰ ਪ੍ਰਾਪਤ ਹੋਇਆ ਹੈ। ਇਸੇ ਫਿਲਮ ਲਈ ਕੈਥਰੀਨ ਨੂੰ ਸਰਵੋਤਮ ਨਿਰਦੇਸ਼ਕ ਦਾ ਆਸਕਰ ਪੁਰਸਕਾਰ ਮਿਲਿਆ ਹੈ। ਇਸ ਤਰਾਂ ਉਹ ਰਿਦੇਸ਼ਨ ਲਈ ਆਸਕਰ ਜਿੱਤਣ ਵਾਲੀ ਪਹਿਲੀ ਮਹਿਲਾ ਨਿਰਦੇਸ਼ਕ ਬਣ ਗਈ ਹੈ।

ਅਭਿਨੇਤਾ ਜੈਫ ਬ੍ਰਿਗੇਜ ਨੂੰ ਫਿਲਮ ‘ਕ੍ਰੇਜ਼ੀ ਹਾਰਟ’ `ਚ ਨਿਭਾਏ ਗਏ ਕਿਰਦਾਰ ਲਈ ਸਰਵੋਤਮ ਅਭਿਨੇਤਾ ਦੇ ਆਸਕਰ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ। ਸਕਾਟ ਕਪੂਰ ਦੇ ਨਿਰਦੇਸ਼ਨ `ਚ ਬਣੀ ਇਸ ਫਿਲਮ `ਚ ਬ੍ਰਿਗੇਜ ਨੇ ਗਾਇਕ ਬੈਡ ਬਲੇਕ ਦੀ ਭੂਮਿਕਾ ਨਿਭਾਈ ਹੈ।

ਹਾਲੀਵੱੁਡ ਅਭਿਨੇਤਰੀ ਸਾਂਦਰਾ ਬੁਲਾਕ ਨੂੰ ਫਿਲਮ ‘ਦ ਬਲਾਈਂਡ ਸਾਈਡ’ `ਚ ਅਭਿਨੈ ਕਰਨ ਲਈ ਸਰਵੋਤਮ ਅਭਿਨੇਤਰੀ ਦਾ ਪੁਰਸਕਾਰ ਦਿੱਤਾ ਗਿਆ।

ਅਭਿਨੇਤਰੀ ਮੋਨਿਕ ਨੂੰ ਫਿਲਮ ‘ਪ੍ਰੀਸੀਅਸ’ `ਚ ਅਭਿਨੈ ਕਰਨ ਲਈ ਸਰਵੋਤਮ ਸਹਿ-ਅਭਿਨੇਤਰੀ ਦਾ ਆਸਕਰ ਦਿੱਤਾ ਗਿਆ। ਹਾਲੀਵੁੱਡ ਅਭਿਨੇਤਾ ਕ੍ਰਿਸਟੋਫ ਵਾਲਟਜ਼ ਨੂੰ ਸਰਵੋਤਮ ਸਹਿ ਅਭਿਨੇਤਾ ਦਾ ਆਸਕਰ ਦਿੱਤਾ ਗਿਆ। ਕ੍ਰਿਸਟੋਫ ਨੂੰ ਇਹ ਪੁਰਸਕਾਰ ਫਿਲਮ ‘ਇੰਗਲੋਰੀਅਸ ਬਾਸਟਰਡਸ’ ਲਈ ਦਿੱਤਾ ਗਿਆ।

ਲੇਖਕ ਮਾਰਕ ਬਾਇਲ ਨੇ ਫਿਲਮ ‘ਦ ਹਰਟ ਲਾਕਰ’ ਲਈ ਸਰਵੋਤਮ ਮੂਲ ਪੱਟ ਕਥਾ ਦਾ ਪੁਰਸਕਾਰ ਹਾਸਿਲ ਕੀਤਾ ਹੈ।

ਫਿਲਮ ‘ਦ ਹਾਰਟ ਲਾਕਰ’ ਲਈ ਬੌਬ ਮੁਰਾਵਸਕੀ ਅਤੇ ਕ੍ਰਿਸ ਇੰਸ ਨੂੰ ਸਰਵੋਤਮ ਸੰਪਾਦਨ ਦੇ ਆਸਕਰ ਪੁਰਸਕਾਰ ਨਾਲ ਨਿਵਾਜਿਆ ਗਿਆ। ਪਾਲ ਐਨ. ਜੇ. ਆਟੋਸਨ ਨੂੰ ਇਸ ਫਿਲਮ ਲਈ ਸਰਵੋਤਮ ਸਾਊਂਡ ਐਡੀਟਿੰਗ ਦਾ ਪੁਰਸਕਾਰ ਮਿਲਿਆ ਹੈ ਜਦ ਕਿ ਇਸੇ ਫਿਲਮ ਲਈ ਸਰਵੋਤਮ ਸਾਊਂਡ ਮਿਕਸਿੰਗ ਦੇ ਆਸਕਰ ਸੇ ਰੇ ਬੇਕੇਟ ਅਤੇ ਆਟੋਸਨ ਨੂੰ ਸੰਯੁਕਤ ਰੂਪ `ਚ ਪੁਰਸਕਾਰ ਦਿੱਤਾ ਗਿਆ।

ਜੇਮਸ ਕੈਮਰੂਨ ਦੀ ਬਹੁ ਚਰਚਿਤ ਫਿਲਮ ‘ਅਵਤਾਰ’ ਨੂੰ ਸਰਵੋਤਮ ਵਿਜੂਅਲ ਇਫੈਕਟ ਦਾ ਪੁਰਸਕਾਰ ਦਿੱਤਾ ਗਿਆ। ਇਸ ਫਿਲਮ `ਚ ਸ਼ਾਨਦਾਰ ਵਿਜੂਅਲ ਇਫੈਕਟ ਦਾ ਸਿਹਰਾ ਜੋ ਲੇਚੇਰੀ, ਸਟੀਫਨ ਰੋਸੇਨਬਾਮ, ਰਿਚਰਡ ਬੇਨਹੇਮ ਅਤੇ ਏਂਡਰਿਊ ਆਰ. ਜੋਨਸ ਨੂੰ ਜਾਂਦਾ ਹੈ। ਇਸੇ ਫਿਲਮ ਲਈ ਸਰਵੋਤਮ ਫੋਟੋ ਗ੍ਰਾਫੀ ਦਾ ਪੁਰਸਕਾਰ ਮਾਰੋ ਫਿਓਰੋ ਨੂੰ ਮਿਲਿਆ ਹੈ। ਫਿਲਮ ‘ਪ੍ਰੀਸੀਅਸ’ ਲਈ ਜਿਓਫ੍ਰੇ ਫਲੇਚਰ ਨੇ ਸਰਵੋਤਮ ‘ਅਡਾਪਟਡ ਸਕਰੀਨ ਪਲੇ’ ਦਾ ਆਸਕਰ ਪੁਰਸਕਾਰ ਹਾਸਿਲ ਕੀਤਾ ਹੈ। ਅਰਜਨਟੀਨਾ ਦੀ ਫਿਲਮ ‘ਦ ਸੀਕ੍ਰੇਟ ਇਨ ਦੇਅਰ ਆਈਜ਼’ ਨੇ 82ਵੇਂ ਆਸਕਰ ਪੁਰਸਕਾਰਾਂ `ਚ ਵਿਦੇਸ਼ੀ ਭਾਸ਼ਾ ਦੀ ਸਰਵੋਤਮ ਫਿਲਮ ਦਾ ਪੁਰਸਕਾਰ ਜਿੱਤਿਆ ਹੈ। ਫਿਲਮ ‘ਦ ਨਿਊ ਟੇਨੇਂਟਸ’ ਲਈ ਜੋਆਕਿਮ ਬੈਕ ਅਤੇ ਤਿਵੀ ਮੈਗਨੁਸੋਨ ਨੇ ਸਰਵੋਤਮ ਲਘੂ ਫਿਲਮ ਦਾ ਆਸਕਰ ਪ੍ਰਾਪਤ ਕੀਤਾ ਹੈ।